Nongstoiñ, Nailar 18: Na ka bynta ban pynkhreh ïa ka election ka ban long ha u snem ban wan 2023, ka Hill State People Democratic Party Nongstoiñ Area Unit kan pynlong ïa ka jingïalang ha ka 20 tarik mynta u bnai kaba dei ka sngi saitjaiñ ha Bishop hall New Nongstoiñ.
Kat kum ka jingtip ba la ïoh lum mynta ka sngi la ong ba ha ka sngi balang ba la dep ka party ka la pynlong ïa ka Executive Committee ha ophis treikam jong ka ha Upper New Nongstoiñ. Hynrei ha katei ka sngi ki don kumba san ngut ki dkhot ka Executive Committee kiba mar shu sdang ka Committee bad pynsngew ïa ki mat ban ïa kren, ki la mih jyndat noh bad kim shym la wan shuh haduh ba ka Committee ka la wai.
La ïoh jingtip ruh ba wat la ki kitei ki dkhot ka Executive Committee ki la phet jyndat noh ruh, ka Committee ka la ïaid beit namar ba palat sanphew ngut ki dkhot na ki primary unit hapoh ka Constituency, ki dang sah na ka bynta ban ïakren ïa ki agenda kiba la wan rah ha katei ka EC.
La ïoh jingtip ruh ba ha katei ka sngi ka EC ka la ïakut ban pynlong ïa ka jingïalang ha ka sngi saitjaiñ ban wan ka 20 tarik mynta u bnai. Ka la kyntu ruh ïa baroh ki nongkitkam kata ki president bad ki secretary jong baroh ki primary Unit hapoh ka Constituency, ba kin ïa poi ryntih hakatei ka sngi ha ka jaka ba la buh ha ka por 11 baje mynstep. Ha katei ka sngi ka jingïalang kan sa phah noh ïa ki aplikeshon jong ki kyrtong kiba la aplai tiket sha ki nongïalam jong ka Central Election Committee ba kin leh ïa kaba donkam.
