La sngi Saitjaiñ ka jingïalang jong ka Meghalaya Schools Welfare Development Association

Shillong, Ïaïong 28: Na ka liang jong ka Meghalaya Schools Welfare Development Association- Central Body (MSWDA-CB) lyngba u President Bah H. M. Marbaniang ka pyntip sha baroh ki President, Secretary SMC, Principal/Headmistress/Headmaster/ lane ki Nongmihkhmat na ki Skul naduh Pre- Primary haduh Secondary/ Higher Secondary na Khasi Jaiñtia ban wan sha ka Meeting ka ban long ha ka 3/5/2025 (Saturday) por 11:00 baje mynstep ha Raitsamthiah Community Hall hajan Christian Academy School ban ïakren halor ka phang jong ka language policy ba thmu ban pynlong Compulsory subject ïa ka Ktien Khasi bad Garo haduh ka Class IV ïa kaba la pan ban ai jingmut da ka Education Department. Kumjuh ruh ban pynshai halor ki mat ba la ïa kren bad u Education Minister bad ki Officer jong ka Department halor ka memorandum ba la phah.
Ha kaba ïadei bad kane ka Association ka wer bad khot ïa ki skul SSA ki bym treh ne kwah (unwillingness) ban aiti ïa ka skul sha ka Education Department na ka bynta ban ïatreilang halor ka mat ba la dawa da ka Association. Kumjuh ruh ka Association ka kren shai ïa kaba baroh la tip bad sngewthuh ba ki unwillingness kim long kajuh bad kiwei namar ka Management ka la ïapher, hynrei ym pyrshah ïa kiba kloi lane mon ban aiti.