Shillong, Naitung, 03: Ki bor synshar jong ka East Khasi Hills District ki la weng noh ïa ka hukum kaba kham mynshwa ba la pynjari ha ka 21 tarik, Ïaiong, kaba la ailad ïa ki kali rit bad ki kali heh ban ïaid ha surok Mawmaram-Nongthliew-Mawmih-Mawlyndep-Lad Umsaw da kaba buh ïa ki kyndon ba ka jingkhia kam dei ban palat ïa ka 9 Metric Ton.
Hynrei ki bor synshar ki la bthah ïa baroh ki kali ba kin pyndonkam da ka Sub-way ba dang shna thymmai kaba don marjan bad ka jingkieng No. 6/1 ha Umbir, ha ka jaka ban ïaid lyngba ïa ka jingkieng.
Ïa kane ka jingbthah la pynmih da ka District Magistrate ka Kong R.M Kurbah, hadien ka jingai jingmut na u Executive Engineer, PWD (Roads), Umsning Division.
Ka jingshna pyndep ïa ka sub-way ka la pynlong ïa ki bor synshar ban weng noh ïa ki jingpyrkhing ba la pynjari kham mynshwa da kaba ailad ïa ki kali ban pyndonkam ïa ka surok da kaba pynthikna ïa ka jingshngaiñ jong ki paidbah.
Ïa ki kali kit mar la shah ban ïaid lyngba ka jingkieng tang kiba kit hapoh 9 metric tonne.
Nongpoh: U District Magistrate, Ri Bhoi District u la pyntip ba ka jingshna ïa ka surok subway ha ka jingkieng 6/1 kaba don ha Umbir ka la dep bad mynta la plie ban pyndonkam da ki paidbah. Ka jingkit kaba lah ban kit halor katei ka jingkieng ka long tang 9 metric ton, hynrei la bthah ia baroh ki kali kiba rit bad kiba heh ba kim dei ban ïaid lyngba ka jingkieng, hynrei ban pyndonkam da ka subway kaba dang shna thymmai kaba don marjan bad katei ka jingkieng.
U District Magistrate kumba la pynkupbor ha ka Section 163 BNSS 2023, u la weng noh ïa ka hukum ba la pynmih mynshwa kaba khang ïa ka jingïaid ki kali kiba heh bad kiba kit palat ïa ka 9 MT ha ka surok Mawmaram – Nongthliew – Mawmih – Mawlyndep. La hukum ba ki kali kiba rit bad kiba heh kim dei ban kit palat 9 metric tonne bad la bthah ba kim dei ban ïaid lyngba ka jingkieng 6/1 ha Umbir hynrei ki dei ban pyndonkam ïa ka Sub-way ba la shna kyrpang hajan ka jingkieng.
