T ang hadien katto katne sngi ba ka Election Commission jong ka India ka la dep ban pynbna ïa ka jingpynlong ïa ka Election jied MLA ha ka jylla ka lyer election ka la sdang ban khluit ha ka jylla namar ki nongïalam ki seng saiñ pyrthei ki la bunkam ban leit her kylleng ki jaka ban sdang ïa pynksan nia khnang ba ki paidbah kin ngop bad jied ïa ki na ka bynta san snem. Lah ban pynkynmaw ba ka tarik ba khatduh ban thep kyrteng ha ka jylla kan long ha ka 7 tarik, ka tarik ban bishar bniah ïa ki kot ki sla kan long ha ka 8 tarik, ka tarik ban weng na ka lympung jingïakhun kan long 10 tarik , ka tarik ban thep vote kan long ha ka 27 tarik bad ka tarik ban niew ïa ki vote kan long ha ka 2 tarik.
Wat la ki dang don ki party kiba ym pat pynbna lut ïa ki kyrtong jongki hynrei ka jingïa ther na ki rynsan ka la jur bha mynta. Kumba ka paw la jan baroh baroh ki seng saiñ pyrthei wat kiba ïatrei lang bad ka NPP ha ka sorkar MDA ruh ki ther kylla beit ïa ka NPP la i kumba ka synshar tang marwei. Kynmaw kine ki seng saiñ pyrthei kiba don ha ka sorkar MDA ki dei ban da bishar bniah bha shwa ban kren ei ei na rynsan ïoh ka kyrtoh kylla ïa ki namar ki ruh ki ïadon bynta lang haba shim rai ïa kano kano ka kam . Wat ïa kane ka jingïapynbeit pud bad ka Assam ruh kynmaw ym dei tang ka NPP kaba rai hynrei la rai lang da ka MDA kaba kynthup ïa ki party NPP, UDP, PDF, HSPDP, KHNAM, bad BJP.
Hooid ym lah ban len ka Congress bad ka TMC ki don ka hok ban ther ïa ka sorkar MDA bad ïa ka NPP kaba ïalam ia ka jingsynshar lada ki lap ba ki don da shisha kino kino ki jingleh bakla jong kane ka sorkar namar ka ju long hi barobor ba kiba don ha ka Liang Pyrshah ki ju ther beit ïa ka Liang Synshar ha ka por election.
Ym lah ruh ban len ba ka don ka jingkynnoh ba ka NPP kan ther beit da ka pisa hynrei kynmaw ka TMC bad ka BJP ruh ki dei ki party kiba khlaiñ bor kiba don ha kabor kata ka TMC ha West Bengal kaba dei kawei na ki kad khaïi ba heh lyngba ka duriaw bad kumjuh ruh ka BJP ha ka sorkar pdeng. Kumta kine ruh kumba ka paw hi kin ther beit namar la ïohi hi ïa kata ba naduh bym pat treikam ka Model Code of Conduct (MCC) la satah sa tang ki dur ki dar jong ki nongïalam jongki ha ki kynroh, ki flex bad ter ter. Hynrei mar ïa treikam ka MCC ki bor synshar district ki la phah ban weng lut ïa baroh ki dur bad kumta mynta la kham i pyngngad ban leit ban wan ruh.
Ka lyer election kaba kham khluit bha ka long sha ki thaiñ nongkyndong bad khamtam eh ha Jaintia Hills namar ka jingïa ther ka long kaba jur bha bad ka jingïapeit miet peit ïong ruh ka la ïaid bha ha ki thaiñ nongkyndong. Hooid kiba bun ki pynpaw ba donkam ban kyiar na kaba shim ïa ka pisa ne shah thied ha ki kyrtong hynrei kaba lyngngoh ka long ba haba ki kyrtong ki ïaid ki ïeng ki paidbah kiba donkam jingïarap ki la ap khmih lynti hi. Kumta ban ong kyiar na ka pisa imat ka long kaba jynjar bha namar hangne ha jylla kiba bun kiba pli ki dei tang ki nongrep, nongbylla bad lada ïoh kham bun bad lait ka leit bylla tang katta ka la biang hi ïa ki.
Hooid ha sor ka pisa ka lah ban ym treikam than haduh katta katta hynrei ha ki thaiñ nongkyndong te la sngewthuh ba ka pisa ka treikam beit namar da ki kyrtong kiba ïaleh hi ki pynpaw ba ha kane ka juk ba mynta lada ym don pisa hi te bha ba ynnai ïaleh ïa ka election namar haba la don ba la hikai ïa ki paidbah ki paidbah ruh ki la shu ap khmih lynti beit. Ban ong ba ngi dei ban pynlong ïa ka election kaba khuid bad suba bad kaba lait na kino kino ki jingïather tyngka te la i jynjar imat namar ha Jaintia Hills lei lei lada ym pat don da ki klur imat ban ïakhun ïa ka election ruh ym i nud shuh.
