Ka aïom sma rong surok ba shisien san snem ka la sdang ban sma ha kylleng ki jaka, ki shnong ki thaw la ka long ha ki thaiñ nongkyndong, khap sor bad wad hapdeng sor ruh kumjuh. Kane ka jingsdang ban sma rong surok ka ju jia shisien man ka san snem bad haba la wan ka jingsma rong surok la sngewthuh ba ka por ilekshon jied nongmihkhmat ka la jan. Kadei ka jingsdang jong ka aïom ha kaba ki surok kiba la shah ieh khunswet baroh shi katta khamtam ha ki thaiñ nongkyndong ki la sdang ban phuh mut phuh mat watla ym lah ban siang ha ka rukom kaba dei ruh, ki surok ki la sdang ban kylla rong ïong hynrei kiban neh tang katto katne bnai.
Bad kadei ruh ka ïa kaba la sdang ban bunkam bha ha ka liang ki jingpynlong ïa ki prokram bapher bapher la ka long ki jingïalang sam skhim, ki prokram pynkup burom, ki jingpynlong ïa ki tamasa, ki prokram jingïalehkai nalor kiwei kiwei. Kadei ruh ka ïa ba ki paidbah ki sngewtynnad tam ban ïoh bamja ei, dih sha ei, shong kali ei bad kumta ter ter. Dei ha kaba kum kane ka aïom ba ki nongshong shnong ki nud ruh ban buh jingkylli ïa la u nongmihkhmat balei u khlem lah ban leh ïa kane katai lane u khlem lah ban pynurlong ïa ki jingkular kiba u khlei ha ki ilekshon kiba lah dep. Dei ruh ha kum kane ka ba ki nongthep vote ki pynap shibun ki jingkylli na bynta u MLA ha shwa ba kin leit biang ban jied ïa u MLA uba thymmai ha u 2023. Dei ruh ha kum kane ka aïom ba ki paidbah ki ïoh ban pyrkhat bad bishar bniah namar bun kiwei pat ki kyrtong kin wan ban pynshai ne ban kular ha khmat jong ki ïa ka thong kaba ki kwah ban trei lada ki jop kum u MLA jong ki.
Bunsien hi ka jingrem noh jong ki MLA tang hadien shi samoi ba ki jop kadei namar ka jingkular jong ki bad ka kam kaba ki trei kam ïahap satia. Don ruh ki MLA kiba la mad noh ïa ka jingshah rem tang namar ba ynda ki la jop ki la kiar wat ban kynduh ïa ki nongthep vote khamtam eh ïa ki nongkyrshan la jong. Ka daw kaba hakhmat kaba ju long ka daw rem ïa ki kadei ba kaei kaba ki kular ha shwa ka elekshon kam ïahap wat tang shi pawa na kaba ki pyndep. Ka jingmih jong ki nongïalam ban leit kyrshan sha kiwei pat ki kyrtong ba thymmai ynda la jan ka elekshon ruh kadei ka dawbah kaba pynrem ïa ki. Hynrei ha kawei pat ka liang, don ki nongmihkhmat kiba trei shisha na ka bynta ki paidbah nongthep vote hynrei tang namar ki klet noh ban burom ïa ki nongïalam, ynda la dei ka por ban jied biang ïa ki nongmihkhmat, bun ki shah pynbiej noh ha kiwei ki kyrtong. Ym lah ban len ba ki don ki nongïalam kiba lah ban pynkohnguh ïa ki spah ngut ki nongkyrshan ruh ha ka por elekshon bad kane hi kadei kaba ktah bha ïa ki kyrtong lada jia ba kim lah ban pynhun ne pynbiang ïa kum kitei ki nongïalam.
Ka saiñ pyrthei hi ha Meghalaya ka pher bha bad la ju ïohi ruh ba man ka san snem kumba 20 haduh 30 ngut ki MLA ki ju shah rem bad mih bujli da kiba thymmai. Katkum ka jingïohi kane ka lah ban dei ruh na ka rukom sam ne pynpoi ïa ki skim kam pynroi sha ki shnong ki thaw ne ki ïing ki sem. Ki nongïalam jong ki unit bapher bapher kim dei satia ban shaniah tylli tang ha iwei ne ar tylli ki nongïalam hynrei ban da don ki briew kiba peit pyrman man la ki unit khnang ba ki kam pynroi kin ym poi tang ha ki bahaïing jong ki nongkitkam jong ki unit. Kane ka ju jia beit ha man la ki constituency bad kane hi kadei ka daw kaba hakhmat eh kaba u MLA um ju tip ei ei ïa kaei kaba ki nongkitkam ki leh hynrei ha kaba khatduh dei ma u ba mad ïa ka jingshah rem.
Ka por mynta ka la ih bha ruh na ka bynta ki kynhun kiba ju wad jingtip lyngba ka RTI ban tip ïa ki kam pynroi kiba poi ha ki shnong ki thaw. Kito ki kynhun kiba smat ban wad ïa kum kitei ki jingtip ki dei ruh ban da wad bniah hato kiba ïoh ïa kitei ki skim kam pynroi na u nongmihkhmat kidei kiba dei hok shisha ban ïoh ne dei pynban da ki bahaïing suda jong ki nongkitkam ha ki shnong ki thaw. Lada ki lap ba kadei pynban ka skim tang na ka bynta ki bahaïing ki dei ban pynshai paidbah khnang ba kiba bun balang kin tip bad kin ïoh ruh ban rai ha ka por thep vote.
Ki paidbah ki dei ruh ban husiar ba ha ka por thep vote kim dei satia ban shah pynngop noh shi khyllipmat tang ha ki tyngka pliah hynrei ban ieng beit ha ka nongrim. Lada ki don tang kumba mar shiteng na ki nongshong shnong kiba sngewthuh ïa kane, ka jingshah thied ha ka por elekshon kan ym treikam shuh bad ka constituency hi kan sa ïoh da u nongmihkhmat u ba paka.
