Khliehriat Lber 8: Ka tnat treikam jong ka Meghalaya State Rural Livelihood Society(MSRLS), NRLM, East Jaiñtia Hills District, mynta ka sngi ha ryngkat lang bad ka pyrthei baroh kawei ka la rakhe ïa ka sngi kyrpang jong ki kynthei, ïa ka prokram la pynlong ka Khliehriat West Community Hall ha kaba u Deputy Commissioner, East Jaiñtia Hills District, u A. Baranwal, IAS, u la long kum u kongsan.
Haba kren kum u kongsan, u Deputy Commissioner u la ai ka jingiaroh ïa ka jingnoh syniang ba radbah jong ki kynthei ka ba wanrah ïa ka roi ka kiew ha ka im lang ka sah lang bad kiba la ju shim ruh ïa ka bynta kaba hakhmat ha ka District Mission Management Unit (DDMU) ban kyntiew shuh shuh ïa ki kynthei ha kaba iadei bad ka kamai ka kajih, u la bynrap ruh ba ki kynthei ki dei kiba ju don ka jingkitkhlieh kum ki dkhot ha ka im lang ka sah lang ban rat dyngkhong ïa ka jingduk bad ruh ban kyntiew ïa ka ioh ka kot ha ki longïing longsem kata lyngba ki shlem treikam jong ki kum ki Self Help Group (SHG).
U kongsan, u la ban jur halor ka phang kaba iadei bad ka jingpynkup bor ïa ki kynthei ha ka thoh ka pule khamtam eh na ka bynta kito ki kynthei ki bym nang ban thoh ban pule.
U Additional Deputy Commissioner, uba dei ruh u Project Director jong ka District Rural Development Agency, (DRDA), East Jaiñtia Hills District, u bah G. Warjri, MCS u la ong ba ka tnat ka la pynlong ïa kum kane ka prokram ba kyrpang khnang ban dup tip bad sngewthuh ïa ka jingnoh syniang ki kynthei ha kaba kyntiew lem ïa ka im lang ka sah lang ha kajuh ka por, u kyntu ïa ki kynthei ba kin mih shakhmat ban noh syniang shuh shuh sa ha kiwei kiwei ki bynta ruh ban kyntiew ïa ka thaiñ.
Ha kane ka prokram la ioh ruh ïa ka jingrwai kyrpang na ka kynhun Ïainehskhem VO, Khliehriat West, la pyni ruh lyngba ka screen ïa kawei ka video kaba iadei bad ki kam jong ka MSRLS, ha East Jaiñtia Hills District.
