Shillong, Risaw 23 : Ka Meghalaya Cricket Association (MCA) ha ka sngi Saitjaiñ ka la ïoh ban pynlong ïa ka elekshon jong ka Apex Council ha Umbir, Ri-Bhoi, ha kaba u Bah Gideon Kharkongor u la shah jied biang kum u Honorary Secretary, katba u Naba Bhattacharjee u la wanphai biang kum u President.
Baroh arngut ki la jop khlem da don ba ïakhun pyrshah. U Bhatacharjee u la bat kum u Honorary Secretary ha ki snem bala leit noh shwa ba u Bah Gideon Kharkongor u shimti ha u snem 2019. Dei lyngba ka jingïalam jong kitei ki arngut ba ka Meghalaya kala shah kynthup kum ka dkhot ba pura jong ka BCCI bad sdang ruh ban ïashim bynta ha ki lympung ïalehkai kriket hapoh ka ri India.
U Bah Gideon Kharkongor u la trei shitom ban pynïaid shaphrang bad ban kyntiew ïa ka jingïalehkai kriket hapoh ka jylla watla hapdeng ka jingshah pynthut ha ka khlam jingpang Covid-19. Ka Apex Council kan sa pynïaid shaphrang ban kyntiew ïa ka jingïalehkai kriket hapoh ka jylla, da kaba yn dang shwa naduh kiba dang rit ha baroh ki district kiba la pynïasoh sha ka (MCA), da kaba pynbit pynbiang ki jaka ïalehkai khnang ba ka Meghalaya kan ïoh ban ïashim bynta ha ki tournament jong ka BCCI da ka thong ban kyntiew ïa kaba kum kane ka jait jingïalehkai kaban pawnam lyngba ka jingkyntiew ïa ka sap jong ki samla.
Sa saw tylli ki kam ha ka Apex Counil ki ban sa thung kum ki nongkikam ba kynthup ka kam Vice-President, Honorary Joint Secretary, Honorary Treasurer bad Dkhot (Councillor).
U Chiang D Shira ruh ula wan phai biang kum u Joint Secretary khlem da don ba ïakhun pyrshah, katba u Sengnab Momin ula shah jied kum u dkhot ba thymmai.
Artylli ki kam kiba don hapdeng ka jingïakhun ba kynthup ka kam Vice President bad Treasurer ha kaba mar arngut ki kyrtong ki la ïakhun. Ha katei ka jingïakhun, u Bah Rayonald Kharkamni ula jop kum u Vice President bad u Dhubajyoti Thakuria kum u Treasurer.
“Ka elekshon ka long kaba khuid ba suba,” ong u Bah W Khyllep, uba dei u Electoral Officer da kaba bynrap ba la pynlong ïa kane ka elekshon kat kum ki kyndon jong ka BCCI bad ki kyndon jong ka Election Commission ka Ri India (ECI).
La jied ïa kitei ki nongkitkam da ki nongmihkhmat jong ki 11 tylli ki District kiba ïasoh bad ka MCA. Ïa ka Electoral Roll la pynmih ha ka 10 tarik Risaw katba ïa ka jingthep kyrteng la pdiang myn ha ka 14 tarik ha kaba ki la don 11 ngut kila thep kyrteng.
Ïa ka jingbishar bniah ïa ki kyrteng la leh ha ka 14 tarik Risaw hynrei lai ngut kila weng noh ïalade ha ka sngi kaba bud kiba la thep ban ïakhun ïa ka kam Vice President, Treasurer bad Dkhot (Councillor).
Ka jingïathep vote myn ha ka sngi Saitjaiñ ka dei tang ïa ka kam Vice President bad Treasurer.
