La pynthikna ïa baroh 8 tylli ki kynhun ban ïakhun ïa ka QF jong ka MSL 2024

Shillong, Naiwieng 08: Ka Tournament Committee jong ka Meghalaya State League 2024 ka la pynthikna ïa ki 8 tylli ki kynhun ki ban sa ïakhun ha ka Quarterfinal jong ka sien pynlong ba saw jong kane ka lympung.
Kane ka lympung phutbol kaba hehduh jong ka Meghalaya Football Association, ba la kyrshan da ka sorkar jylla Meghalaya, kan sakhi biang ïa ka jingïakhun kaba jur bha hapdeng ka Rangdajied United kaba dang ïakhun ban ïada ïa ka burom lahduh bad ka Shillong Lajong kaba la rah ïa ka MSL ha u snem 2019 ha kaba kin sa ïakhun pyrshah ha ka jingïakhun quarterfinal kaba lai.
Haba phaidien, ka Lajong ka la lah ban pynliem ïa ka Rangdajied ha ka phainal jong u snem 2019 ban rah ïa ka khusnam lahduh ha Khliehriat hynrei ka Rangdajied ka la wanphai biang ban kput kylla da kaba pynkhyllem ïa ka SLFC ha ka semifinal kaba itynnat ha u snem 2023.
Shuh shuh, ha ka quarter final jong ka MSL 2024 yn sakhi ruh ïa ka jingïalehkai ‘Derby’ hapdeng ar tylli ki kynhun na Jaintia Hills – kata hapdeng ka Sutnga kaba na East Jaintia pyrshah ïa ka Ladthadlaboh jong ka West Jaintia ki ban aireng pyrshah ha ka quarterfinal kaba ar. Katba ka querterfinal kaba nyngkong eh mynta u snem kan long hapdeng ka Chipakkore pyrshah ïa ka Rymbai Skhenshynriah.
Ha kawei pat ka liang, ka Mawlai, kan ïoh ïa ka lad ban kput kylliang ïa ka Khliehmawlieh ha ka jingïakhun quarterfinal kaba saw. Kumban shu pynkynmaw, ka Khliehmawlieh ka la pynkhyllem noh ïa ka Mawlai ha ka semi final jong ka MSL 2023 kaba la long ha Shillong, hynrei rem noh ha ka Rangdajied ha ka final.
Hynrei ha kaba ïadei bad ki tarik bad ki jaka ban pynlong ïa kine ki jingïakhun ym pat lah ban pynthikna da ka Tournament Committee.
Dang shen ka MFA ka la shim ïa ka rai ban sangeh noh shipor ïa ka MSL hadien ba la pyndep baroh ki jingïalehkai ha ki group stage, bad kane ka rai ka long na ka bynta ban ailad ïa ka kynhun ïalehkai shynrang ban mihkhmat ïa ka Jylla ba kan pynkhreh biangpor ïa ka National Football Championship na ka bynta ka Santosh Trophy 2024-25, ka ban sdang ha kaba kut jong une u bnai.
La ïoh ban pyndep ïa baroh ki jingïalehkai group stage jong ka MSL ha ka sngi Palei (kata 07 tarik Naiwieng) bad ha ka sngi Thohdieng la ïoh ban pynthikna ba ka Sutnga ka la long ka nongjop na ka Group B ha Mawkyrwat. Kane ka Group ka la shem jingeh ban shim ïa ka rai namar ba haduh lai tylli ki kynhun ki la pyndep ïa ka group stage bad ïaryngkat da mar 6 poiñ, kiwei pat ki ar tylli ki kynhun ki dei ka Khliehmawlieh bad ka Mawten. Kawei pa kawei ka kynhun ka la lah ban jop ïa kawei pat hynrei ha kaba khadduh ka Sutnga ka long kaba kham biang da ka jingiapher kol.
Wat la katta ruh ka Khliehmawlieh ka la ïoh ban rung sha ka quarterfinal kum kawei na ki ar tylli ki kynhun kyrdan ba ar ba kham kynsai napdeng ki hynriew tylli ki Group.
Ka Rymbai Skhenshynriah ka dei kawei pat ka kynhun ba wan ba ar kaba la thikna ban rung QF hadien ba kamai 7 point, katba ka Khliehmawlieh bad ka Lumsohkhlur ki la ïoh mar katjuh ka point (6) bad mar katjuh ka jingïapher kol (+1) hynrei ka Khliehmawlieh ka la thep bun kol (5 la 4) ban pynthikna ïalade sha ka quarter final.