Jowai, Lber 31: Ka Sengkur Sari Sengkmie kala pynkynriah ïaka tarik jong ka Dorbar Bah General Meeting kaba mut ban long haka 12/04/2025 ha ka Shnong Wahiajer West Jaiñtia Hills District hynrei ïa kane ka tarik kumba la kdew haneng ka Seng Kur Sari ka la hap pynkynriah ïa ka sha 26/04/2025 na ka daw ba ha katei ka tarik bala dep ban pynbna shwa ka ïa tyngkhuh bad ka Shad Sukra ka Seiñ Raij Mukhla.
Na ka liang ka Seng Kur Sari Sengkmie ka kyrpad ïa baroh ki khun ka kur ba kin sngewbha ban ïa poi sha katei ka jingïalang kumba la dep ban kdew ïa ka tarik. Ka thong jong kane ka Dorbar bah ka long ba ngin ioh ban ia kynduh ia baroh ki khun, ki kti ki hymmen ki para jong ka Kur Sari kiba shong ba sah sha kylleng kylleng ki shnong ki thaw naduh na thaiñ Ripnar, Ri Khasi, Ri Bhoi bad shaduh sha ki thain Assam.
Ka Sengkur Sari Sengkmie ka khot bad wer ïa baroh ki hymmen ki para ki meiheh mei san ban ïa pyllait por khnang khnang ha katei ka Tarik 26/04/2025 ban ïawan sha katei ka Dorbar Bah ka jingïa kynduh lang khrui ki khun ka Kur Sari kiba shong ba sah hapoh kane ka Jylla Meghalaya bad kumjuh ïa kiba shong shapoh u pud u sam ka Jylla Assam.
Ha kane ka jingïa kynduh lang ha Dorbar yn ïoh ban ïakren ïa khana ïa pynbeit ïa kiwei kiwei ki kam kiba ka Seng Kur Sari kan leh na ka bynta ki khun jong ka Kur khamtam kumba la iohi sha ki kot khubor ba ka Sorkar Jylla lyngba ki District Council khamtam hapoh ka Khasi Hills Autonomous District Council ka la ithuh ïa ka kur Sari, kumjuh ïa ki nongïalam jong ki kur bapher bapher hapoh u pud u sam jong ka KHADC bad kumjuh ruh sha ki thaiñ Pnar.
Na ka liang jong ka Dorbar ki Waheh Kur Ri Jaiñtia kala dep ban leit buh jingthoh sha ka Jaiñtia Hills Autonomous District Council ba ka ruh kan ithuh noh ïa baroh ki kur ki jait kiba don hapoh u pud u sam jong ka. Pynkut ka kyrwoh na u Rgh. S. Sari General Secretary Seng Kur Sari Sengkmie, Meghalaya
