Jowai, Naiwieng 02: Kum shibynta ban kyntiew ïa ka ïoh ka kot jong ki Self-Help Group (SHGs), ka Jaiñtia Hills Development Society (JHDS) ryngkat bad ka jingïatreilang bad ka ophis jong Deputy Commissioner ka West Jaiñtia Hills District kala pynlong ïaka jingai jinghikai ba 15 sngi halor ka kam shna Sabon bad shna jingbam na ki soh bad ki jhur.
Ïa kane ka Training prokram la plie pyrda naduh ka 17th October bad la pynkut hynin ka sngi kata 1st November 2022 hapoh ka jingpynïaid ka JHDS, ha Samanlang Socio-Cultural Pastoral Centre, Mihmyntdu Lumbihsyntu.
Ha kane ka sngi ba kut jong kane ka prokram, la don ka Theory bad Practical exam kaba la sdang naduh ka por 10 baje mynstep. Ha ka por janmiet la don ka Cultural Prokram ba la pynïaid da ka kong Ridu-I Passah. Ha kane ka Cultural prokram la ïohi ïa ki jingshad tynrai bad ki drama ba la ïashim bynta da ki nongshah hikai.
Ha kane ka sngi pynhap pyrda la ïoh ruh ïa ki jingkren ai mynsiem na u Fr. Manbha Pakem, uba long u Director ka Jaiñtia Hills Development Society (JHDS), kumjuh ruh na ka kong Wanmon Tang kaba dei ka Master Trainer, Food Processing bad na u bah Macsal Jones Nongsiej, Master Trainer ka Soap Making. Baroh lai ngut ki nongkren ki la aimynsiem ïa ki nongïashimbynta ba kidei ban sdang noh la ka jong ka kam ym ban shu pynlehnohei ïa ki jinghikai ba ki la ïoh. Ki nongshah hikai ha kane ka jingai jinghikai ba 15 sngi ki kynthup ïa ki samla bad longkmie kiba na ki shnong, Khlokynring, Shangpung Khliehrangnah, Mynska, Saphai, Thadmuthlong bad na Mustem.
