SHILLONG, Nailur 28: Ka lympung ïalehkai badminton ba la tip da ka Shillong Autumn Open Badminton Challenge 2024 ba la pynlong da ka Shillong Badminton Coaching Centre naduh 24 tarik Nailur, 2024 ka la jam sha kaba kut ha kane ka Sngi Saitjaiñ, 28 tarik Nailur ha JN Indoor Sports Stadium, Polo-Shillong.
Kumban shu pynkynmaw, ïa kane ka lympung la wan plie pyrda da u Rajesh Kamal, General Secretary jong ka Meghalaya State Badminton Association , ha kaba la sdang ïa ki jingïalehkai na bynta ki Shynrang bad Kynthei ha ka kyrdan U-13, U-15, U-17 bad U-19 . Ki la don haduh 62 ngut ki nongïashimbynta ha kine ki kyrdan, ba kynthup ha ka ïakhun marwei bad shijur.
La pynhap pyrda ïa kane ka Tournament da u Bah D. P. Wahlang, Chief Secretary, Sorkar Meghalaya, u ba la wan kum u Kongsan.
Katba ki jingïalehkai ha ka sngi khylliap pyrda ka long hapdeng ki player ba la rangbah under 35+, 45+, 55+ bad 60, kiba la sdang naduh ka 27tarik.
Lah ban kdew ba ka jingpynlong ïa kane ka lympung ka long shi bynta ban rakhe ïa ka Autumn Festival bad ban kyntiew ïa ka jingïalehkai Badminton bad ruh ban phriang ïa ka khubor halor ka koit ka khiah. Kane ka lympung la kyrshan ruh da ka Meghalaya Aids Control Society, Meghalaya Tourism, Wellness Club, Futsal, Umroi, Ri Bhoi District bad kiwei kiwei.
