La pyllait ïa ka Draft Electoral Roll jong ki lai tylli ki Constituency ka West Khasi

Nongstoiñ, Naiwieng 9: Mynta ka sngi ka 9 tarik Naiwieng ka ophis jong Deputy Commissioner ka West Khasi Hills, ka la pyllait ïa ka thup kyrteng jong ki nongthep vote kiba la kynjoh 18 snem ha duh ka 1 tarik Kyllalyngkot 2022 na ka bynta ki lai tylli ki Constituency ka 32 Nongtoiñ, 33 Rambrai Jyrngam bad 34 Mawshynrut Constituency.
Ïa ka jingpyllait ïa ka thup kyrteng jong ki nongthep vote ha kitei ki Constituencies, la pynlong ha ka jingïalang kaba la long ha Conference hall jong ka ophis u Deputy Commissioner ha kaba la ïa don lang da ki EROs AEROs bad ki Election agent jong ki seng saiñ pyrthei bapher bapher.
Shuwa ban ati ïa ki thup kyrteng sha ki Election agent la ïoh ïa ka jingkren lyngkot na u bah Diengdoh, u ba la pynshai ba ka jingpyllait ïa ki thup kyrteng ka long katkum ba la btah da ka Election Commission of India, hadien ba ki BLOs ki la pyndep ïa ka jingleit lum ïa ki kyrteng na man la ki shnong bad ki la pynpoi sha ka District Election Branch jong ka District, ban pynbit pynbiang bad ban pynrung ïa ki ha ka thup kyrteng jong ki electoral roll.
U la pynshai ba ha shuwa ba ka general election kan long ha u snem ban wan, yn sdang biang ban leit lum ïa ki kyrteng bad ban pynrung ïa ki ha ka Electoral roll ha shuwa ka election, khnang ba kin ïoh ban thep ïa ka vote jong ki ha ka por election kum ki nongshong shnong ba pura jong ka ri India.