Nongpoh, Jymmang 04: Ka Ri Bhoi Student Union, Sengkmie mynta ka sngi ka la plie pyrda noh ïa ka ‘1st Eastern Ri Bhoi Inter School Sports Meet’ ba la pynlong da ka Ri Bhoi Students Union na ka bynta ki skul baher baphper ba hap ha ka thain Eastern Ri Bhoi ba la pynlong ha Madan Kurkalang, Lumdaitkhla Bhoirymbong.
Ïa kane ka Inter School Sports meet kaba lai sngi ba la sdang mynta ka sngi bad ban pynkut noh ha ka 5 tarik u Jymmang 2022 la wan ban plie pyrda da u MLA ka Umroi, u Bah George B. Lyngdoh kum u kongsan bad la sakhi lang ruh da ka jingdon lang u Samla Cornelius Laloo kum u symbut kongsan.
Ha kane ka sngi la sakhi lang ruh da ka jingdon lang u Sirdar ka Raid Madan Kyrdem, u Bah . Makdoh, u President ka RBSU, u Samla Everjoy Nongpluh, u working President ka RBSU. u Samla Amberlight Masharing, ka Head Mistress ka Kyrdem Higher Secondary School bad kynthup kiwei kiwei ki rangbah bad ki nongïalam ka seng RBSU.
Ha kane ka lympung ïalehkai sports ba la pynlong da ka RBSU la wan ban shim bynta palat 15 tylli ki skul na ka thain Eastern Ri Bhoi, ha kaba la lah ban sdang noh mynta ka sngi hadien ba la plie paidbah da u MLA ka Umroi, u Bah George B. Lyngdoh shuwa ba ki khynnah skul kin ïa aireng ha ki jingïalehkai bapher bapher ba la pynlong hapoh kane ka lai sngi kynthih.
Ki kynhun jong ki skul ba la wan ban shim bynta ki la ïaid ruh da ka March pass kum ka dak ka jingsdang ban plie ïa kane ka sport meet, ha kaba u MLA ka Umroi, u Bah George B. Lyngdoh u la shim ïa ka salute katba ki khynnah skul ki dang ïaid ïa ka march pass ha katei ka madan.
La ai ruh ka jingkren da u President ba rangbah ka RBSU, u Samla everjoy Nongpluh uba la mait phang ba ka daw kaba la pynlong ïa ka seng ban pynlong ïa kane ka lympung ïalehkai sport ka dei ka jingangnjud ka seng ban kyntiew ïa ki khun samla haka kam ïalehkai sport nalor ka kam ba ki pule puthi ha ki skul.
U la bynrap ruh da kaba ong ba ka seng ka khmih lynti ba lada don kum kine ki lympung ïalehkai sport kan plielad ruh ïa ki samla ban sei ïa ki sap ki phong bad kum ka seng ka khmih lynti ruh ba ki khynnah kiba don sap kin pyndonkam hok ïa ki sap khnang lyngba ka kam ïalehkai sport ruh kan long kawei ka lad ioh kam ioh jam ha kaba ha kine ki sngi bun ki khun samla ki la im da ki jingïalehkai sport.
Na ka liang u u MLA ka Umroi, u Bah George B. Lyngdoh haba kren ha kane ka sngi u la ai khublei kyrpang ïa ka RBSU kaba dei kawei na ka seng kaba don ka jingkitkhlieh ban pynlong ïa kane ka sport meet bad u khmih lynti ruh ba kane ka jingpynlong ïa kane ka lympung ïalehkai sport kan long ka jingkmen na ka bynta kito ki khynnah kiba don sap ha ka kam ïalehkai sport.
Shuh shuh, u la kyntu ruh ïa ki khynnah skul ba kim dei ban pynlong kam kai ïa ka jingphah ki kmie ki kpa sha ki skul, hynrei ki dei ban trei shito ha ka jingpule bad lada ki don kata ka sap ha ki kam ïalehkai sport ruh ki dei ban pyndonkam hok namar kum ka dong bad ka thain kan sngewsarong lada mih kita ki khlur ïalehkai sport na katei ka thain kaba long ka jingai mynsiem ruh ïa kiba bun ki khun samla ha katei ka thain bad ha ka District hi baroh kawei, u la bynrap.
