Shillong, Jymmang 4: Hadien ba ïoh jingujor na ki nongïalehkai halor ka jing jaboh bad jing torti na kawei na ka jaka ïalehkai jong ka Meghalaya Games 2022 kaba don ha Laban Sports Club kaba pynlong ïaka jingïalehkai Taekwondo, ka KSU Laban Circle haka jingïalam jong u Samla Jason Laloo Asstistant Finance Secretary jong ka KSU Laban Circle kala leit khmih ïa katei ka jaka.
Ka kyrwoh ba la phah da ka Seng mynta ka sngi, ka ong ba ha katei ka jingleit jurip jong ka Seng la lap ïaka jing torti jong ki nong pynïaid ha kaba ka jaka leit bar bad pynjhieh (Toilets) jong ki nongïalehkai shynrang bad kynthei ka jaboh haduh katta katta bad wat tang ka um ruh kam don.
Ka Seng kala phah ïaki nong pynïaid ba ka dei ban pynkhuid mardor khnang bad ban buh ïaka jingkhuid jingsuba khnang ba kan nym ktah ïaka koit ka khiah jong ki nongïalehkai.
