La plie paidbah ïa u mot dur jong u Syiem Tirot Sing ha Dhaka da u HC bad Dy CM

Shillong, Rymphang, 16: Hadien 189 snem ka jingkhladnoh jong u Syiem Tirot Sing Syiemlieh, u khlawait nongïaleh laitluid ka ri India uba dei ruh u Syiem jong ka Hima Nongkhlaw, uba la ïap ha ka 17 tarik, Naitung, 1835, ha ka jingshah set byndi ha ka Sorkar Bilat ha nongbah Dhaka, mynta ka Sorkar Meghalaya da ka jingïarap ka tnad kam bar ri (Ministry of External Affairs) ka sorkar pdeng la shimkhia ban tei ïa u durmot ha phyllaw jong ka Indira Gandhi Cultural Centre (IGCC), ha nongbah Dhaka, Bangladesh.
Ha kane ka sngi, la plie paidbah ruh ïa ki khana da ki jingthoh dur ba batai ïa ka jingim jong u Tirot Sing Syiem, kiba la wah ha ki kynroh jong ka Indira Gandhi Cultural Centre (IGCC). Nalor kane, ïa ka Indian Council Cultural Centre Library Dhaka ruh la ai kyrteng noh sha ka U Tirot Sing Library ban pynsahnam ïa une u Khla Wait.
La plie paidbah ïa une u durmot da u High Commissioner (HC) ka India sha Bangladesh u Pranay Verma bad u Symbud Myntri Rangbah ka Jylla u Ma Sniawbhalang Dhar ryngkat ka jingsakhi lang jong u Myntri ka tnat Arts and Culture u Bah Paul Lyngdoh, ka Myntri ka koit ka khiah ka Dr. Ampareen Lyngdoh, u Chairman jong ka State Planning Board Bah Metbah Lyngdoh, u Commissioner and Secretary uba khmih ïa ka tnat Art and Culture Bah Frederick Roy Kharkongor, u Chairman barim jong ka UPSC u Prof. David R. Syiemlieh, u Adviser ka Sorkar Jylla u Bah Hamletson Dohling, ki MDC jong ka Khasi Hills Autonomous District Council ba kynthup ïa u Bah Titostarwell Chyne, u Bah Teiborlang Pathaw, u Syiem Khynnah jong ka Hima Nongkhlaw u Pa’iem K.M Syiem, u Syiem ka Hima Bhowal u Pa’iem Kynsai M. Syiem, u Syiem Khynnah jong ka Hima Khyrim u Pa’iem Habapan Syiem bad kiwei kiwei.
ïa kane ka kynhun baroh la lam khmat da u Symbud Myntri Rangbah ma Sniawbhalang Dhar.
ïa kane ka prokram la pynlong da ka IGCC Dhaka, ka tnad Arts and Culture ka sorkar jylla lem bad ka Bangladesh Shilpakala Academy.
Haba kren ha kane ka jingplie ïa une u motdur u Symbud Myntri Rangbah u la ong “ Kane kal ong ka sngi ba sah jingkynmaw bad kaba sngewsarong ïa ka jaidbynriew bad ki paid nongshong shnong ka jylla Meghalaya namar la ïoh ban plie ïa une u motdur sah jingkynmaw jong u Tirot Sing Syiem ha Dhaka”.
U pynpaw ka jingsngewnguh ïa ka tnad Ministry of External Affairs bad kumjuh ruh ïa u High Commissioner jongka India sha bangladesh kiba la ai ka jingkyrshan ïa ka sorkar jylla ban ïoh tei ïa une u motdur sah jingkynmaw ïa une u Khlawait ka Jaidbynriew.
Ha ka jingkren jong u bah Paul Lyngdoh ul a ong “ Une u Khlawait jongka Jaidbynriew u Tirot Sing Syiem u la pyni ïa ka mynsiem jinglong shlur, jong long riewkhraw kum u nongïalam ba shynrang bad dei ruh ha ka por jongu ba ki Syiem Khasi ki la ïatrei lang naduh ka Hima Shillong shaduh Rambrai wat hapdeng ka jingeh bha ka leit ka wan ha kato ka por”.
U Nongshna motdur ba paw ka Jylla bah Raphael Warjri u dei uba pynwandur ïa une u motdur bad ïa ki khana thohdur jong une u Khla Wait.
Ka Tnad Arts & Culture kala pynlut haduh T. 11 lak ban leh ïa kane ka kam bakhraw ban pynsahnam ïa u Tirot Sing.
Ha ka por janmiet, la pynlong pat ïa ka cultural prokram halor ka matpdeng “ U Syiem Tirot Sing – U Khla Wait Ka Ri Khasi” kaba la pynlong ha Jatiya Natyashala Milanayatan, Bangladesh Shilpakala, Shegun Bagicha ha Dhaka.