Mawkyrwat, Rymphang 20: U Additional Deputy Commissioner jong ka South West Khasi Hills District Bah L.T. Tariang ha ka sngi Palei u la ot ïa u ribon kum ka dak ka jingplie ïa kawei ka jaka thew ïa ki Alignment jong ki kali ba la tip kum ka “South West Care and Wheel Care” ne ka Wheel Alignment ha Laitlawsang, Jakrem.
Lah ban kdew ba kane ka South West Care and Wheel Care” ka dei ruh kaba nyngkong duh hapoh ka distrik bad kane ka jingdon ïa kane ka Wheel Alignments kan long ka kabu ksiar ïa kito kiba don ki kali na ka bynta ka jingdonkam jong ki ha kaba ïa dei bad ka jingbit jingbiang jong ka kali ne ki taiar kali.
Haba kren ha ka jingïalang, u Bah Tariang u la ai ka jingïaroh ïa u bah Kevin G Chyne bad ki paralok kiba la sdang ban ïeng ha la ki jong ki kjat ban sdang ban seng kum ïa kine ki jait kam bad ka long ruh shibynta ban pynïoh ne ai kam ai jam ïa ki samla na kane ka thaiñ.
U la ong ruh haba ki leh ïa kano kano ka kam ki donkam ban jied ïa kata ka kam ba ki ki sngewtynnad khnang ba kata ka kam kan nangkiew da kaba kitbok kitrwiang ba ki nanglah ban pynkiew shakhmat ïa kane ka kam ba ki la trei.
Ha kane ka la ïoh ruh ka jingduwai na u bah Fairnesson Wanniang ha ryngkat ka jingïadonlang u bah Lamonlang Kharjahrin, u Alymer Sing Hynñiewta bad kiwei de kiba la shah khot sngewbha.
