Mairang, Naitung 10: Kum shibynta jong ka jingrakhe ïa ka sngi kyrpang jong ki nongri dohkha kaba la tip kum ka National Fish Farmers Day, ka tnat Fisheries jong ka Sorkar Pdeng, ka la pynlong ïa ka Virtual prokram mynta ka sngi na ka bynta ki jylla bapher bapher jong ka Ri India, ha kaba lah ïoh ban plie da u Myntri ka Sorkar Pdeng jong ka tnat Fisheries, Animal Husbandry bad Dairying kata U Parshottam Rupala ïa ki projek ki bapher bapher kiba ïadei bad ka kam ri dohkha.
Ha kane ka prokram, ha Mairang la ïoh ban plie ïa kawei na ki Fish Processing Unit jong ka seng treilang Y. Kharsyntiew SHG ha Umwiehsup, Mairang ïa kaba la bei pisa na ka skhim Pradhan Mantri Matsya Sampada Yojana (PMMSY) na ka bynta u snem 2021-2022, ïa kaba la pyntreikam da ka ophis jong u Superintendent of Fisheries, West Khasi Hills District, Nongstoiñ,
Ha ka prokram ha Mairang, la sakhi ïa ka jingïashimbynta jong u Superintendent of Fisheries ka West Khasi Hills District, Nongstoiñ, u Bah A. Laloo, kiwei kiwei pat ki nongtrei ka tnat Fishery, u Syiem Khynnah jong ka Hima Nongkhlaw, u Paiem K. M Syiemlieh, ki nongïalam shnong lem bad ki paidbah ka thaiñ.
Ha kane ka Fish Processing Unit, lyngba ki kor ki bor katkum kane ka juk kaba mynta, yn lah ban pynmih tungtap ïa kiba yn pynïaid ha ki iew ki hat bapher bapher ha ka jylla hi baroh kawei.
Ka jingplie ïa kane ka shlem pynmih tungtap ka long shibynta na ka jingpyrshang jong ka sorkar, ban kyntiew shuh shuh ïa ka ïoh ka kot jong ki nongshong shnong kiba ïa don bynta bad ka kam ri bad die dohkha, ne kino kino ki marbam ba lah ban pynmih na ka dohkha bad la kyrmen ruh ba kiba kum kine ki jait skhim kin ïarap shuh shuh, ban ai kam ai jam ïa ki nongshong shnong kiba don ïa ka bynta kaba khraw ban kyntiew ïa ka ïoh ka kot jong ka ri bad ka jylla.
Kiwei kiwei pat ki bynta jong katei ka prokram ki kynthup ïa ka jingkren lyngkot na I nongïoh bhah na katei ka skhim, kata, I Kong B. Kharsyntiew, I ba dei I President jong ka Y.Kharsyntiew SHG bad ka jingpyni nam ïa ki tïar ki tar kiba pyndonkam ha kaban pynmih tung tap.
