La plie ïa ka Ialong Suspension Footbridge ha ka jaka ba khring bha ïa nongwan jngoh kai

Jowai, Nailur 08: Ka Dorbar Shnong Ïalong, West Jaiñtia Hills District mynta ka sngi 9 tarik kala plie paidbah ïa ka jingkieng “Ïalong Suspension Footbridge” ha Umdalong kaba don ha ki bynta ka Wah Myntdu kaba dei ruh kawei na ki jaka kaba khring bha ïa ki nongwan jngoh kai pyrthei ban leit shangkai pyngngad.
Ha kane ka sngi la donlang u kongsan ma Wailadmiki Shylla MLA Jowai, ma Phasmon Dkhar MDC symbud kongsan, u BDO Thadlaskeiñ Dr. Brightstar Langbang, bah F.B Basan MCS Project Director DRDA, u Waheh Shnong ma Ram Phawa, bah Sywell Lyngdoh DPM Basin, ki nongshong shnong bad kiwei de.
La ai khusnam ruh ha kane ka sngi ïa u ma Lumlangki Pohti u Supervisor ka Dorbar Shnong Ïalong bad ïa u ma T. Ram Waheh Shnong halor ka jinglah jong ki ban pyndep bad ban pynurlong ïa kane ka project.
La pynsngew lyngba ka jingplie ïa kane ka jingkieng kan long u budlum ïa ki paidbah ban jam sha shiliang ka wah Umdalong (Wah Myntdu) bad kumjuh ïa ki nongrep kiba leit rep sha ki hali ki pynthor bad ha ka juh ka por kan long jingmyntoi ïa ki nongshong shnong ha kaba ïadei bad ka jingïoh kam ïoh jam na ka kam jngohkai pyrthei. Ha ka juh ka por ka Shnong kala pynlong ruh ïa katei ka jaka Umdalong kum ka ‘Fish Sanctuary’.
Ïa kane ka jingkieng la tei ha ka jingmang pisa kaba 65 lak tyngka lyngba ka jingïarap ka ophis Thadlaskeiñ C&RD Block West Jaiñtia Hills bad kumjuh na ka pisa ba mih na ka jingïoh lum na ka Shnong ïa kaba la sdang ban pyntrei naduh ka 2.2.2016, hynrei kane ka project kala don ha ka jingsahteng bad ka Dorbar Shnong Ïalong kala lah ban pyndep ïa ka mynta u bnai Nailur 2023 lyngba ka jingbud dien jong u Waheh Shnong ba mynta u ma R. Phawa.
Na ka liang u kongsan ma Wailadmiki Shylla ula ai ka jingïaroh ïa ka Shnong hapoh ka jingïalam u Waheh Shnong, namar lyngba ka skim shispah sngi la lah ban pyndep ïa kiba bun ki kam pynroi hapoh ka shnong khamtam ïa katei ka jingkieng. U ong ruh ba ka jingïoh ïa kino kino ki skim pynroi ka dei lyngba ka jongtrei shitom jong ki nongïalam Shnong.
Ula kyrpad ïa ki nongshong shnong ba kin long kiba pdiang sngewbha ïa ki nongwan jongkai pyrthei bad kiba sbun ka mynsiem ban ai jingïarap namar ka jingwan kiba nabar shapoh ka shnong ki wan na ka byntga ban pynlut hapoh ka shnong, ong ma Wailad.
Ula pynsngew na ka liang ka sorkar da ka jingïarap u Myntri Rangbah yn mang haduh kumba 20 klur tyngka ïa ka Shnong Ïalong naka bynta ban pynbha ïa ki surok hapoh ka shnong bad khamtam ïa u surok bad ki lynti ïaid kjat haduh ban da poi ha ki bynta ka Wah Myntdu. hadien kane u kongsan ma Wailad ula leit ban khap ruh ïa u ribon jong katei ka jingkieng bad pynher ïa ki baloon.
Ïa ka jingïalang la pynlong harud ka wah Umdalong ba la pynïaid da u ma Masan War, Secretary DS Ïalong, ïa ki ktien pdiang la ïoh na ka kong Shimti Pale, katba ïa ki kyntien ai khublei la ïoh na u Juhhi Pale Asst. Waheh Shnong.
La pynphuh pynphieng shuh shuh ïa kane ka prokram da ki jingshad na ki longkmie, ki khun samla bad ki hep barit ka Dorbar Shnong Ïalong.