Ka jingplie ïa ka University ba nyngkong eh jong ka jylla ha Balgre Damalgre, ka la pynthikna bha, ba ka thymmei jong ka jingstad ka don lut sha Garo hills bad katei ka kynthup ia ka Board of School Education (MBOSE) kaba la don ha ka nongbah Tura, naduh ka por jong ka jingïoh ïa ka jylla rilum bad mynta, sa ka University, kaba peit lut ïa baroh ki kolej ruh ka don ha Tura bad katei ka la paw shai bha, ba ki skul bad ki kolej, ki don mynta ha ka jingpynïaid jong kitei ki ar tylli ki shlem kiba don ha Garo hills.
Ka jingdon jong kitei ki ar tylli ki shlem, kumta ka pyni shai, ba ka jylla baroh kawei ka dei ban phai khmat, ha kaba ïadei bad ka pule puthi sha Garo hills, khamtam sha West bad South Garo hills.
Ban ïatai ïa kane ka mat, ka long kaba jylliew bha, namar ba ki skul kiba paw bad kiba ki samla pule ki ïabeh thong, ki don ha Shillong bad nangta ki kolej ruh ki don hi ha kane ka nongbah bad nangta, sa ka North Eastern Hills University (NEHU) ruh ka don hi ha Shillong bad haba peit jngai ïa kane ka mat, la ïohi pynban, kumba ka ñiewkor shi katdei ka sorkar India ban ïa ka sorkar lajong, namar ba ka NEHU ruh ka don ha Shillong, ka NEIGHRIMS, kaba dei ka jaka sumar kaba pawnam jong ka India ruh ka don ha Shillong bad ki ophis kiba heh duh kum ka NEEPCO, ka ICAR, ki don ha Shillong bad ban da dei ha kine ki sngi, la imat, kumba kitei ruh kin poi lut sha Garo hills.
Kawei pat kaba pyn pyrkhat ka long shuh shuh, ba kumno sa ki karkhana dewbilat lane ba ka jingtih mawshun pat ka jubor tang ha East Jaiñtia hills, ha kaba ki don da ki dorjon tylli ki karkhana dewbilat ha katei ka thaiñ bad ba kitei ki jait karkhana, kim ïoh lad satia ban rung sha Garo hills, ha kaba wat ïa kaba don ha Mawmluh ruh, la hap ban khangdam noh.
Kim dei tang kitei ki ar tylli ki mat, hynrei ngi ïohi, ba ki thymmei jingstad, lada dei ka Medical College, nangta sa ka Stadium kaba la bit ban ïakhun ïa ki jingïalehkai kiba heh jong ka India, la pynbit pynbiang mynta ha Tura bad kitei ki kdew shai, ba katei ka nongbah jong ka Garo hills, kam duna eiei shuh na kaba long ka nongbah Shillong lane lah ban ong, ba ka la nang tam toi bun shah, ha ka jingdon ki shlem kiba kongsan ïa u paidlang ka jylla bad kitei ki la kdew shai, ba ka don ka jingthmu kaba kham peit jngai, ha kaba kan sa mih ka jingïakren, ba lada ka Shillong, ka dei ka nongbah, kumta ka Tura, ka la biang ban dei ka nongbah jong ka jylla.
Nangta la ïohi ruh ha kine ki sngi ba u Myntri Rangbah ka jylla u Conrad Sangma u la leit sam haduh 4 tylli ki M-Tab sha ki 4 spah ngut ki Khynnah skul kiba don hapoh ka thaiñ Garo Hills bad kiba dei ruh ki khynnah skul jong ki 21 tylli ki skul kiba don ha thaiñ Garo Hills da kaba kular ruh ba ïa kine ki M-Tab yn sa aiti ruh sha ki katto katne ngut ki nonghikai ban ïarap ïa ki ba kin lah ban hikai katkum ka juk technology ha ki por mynta bad kaba don ka jingïadei ruh bad ki smart class room, kumta halor kane kumno pat ïa ki khynnah skul ka thaiñ Khasi Hills bad Jaiñtia Hills hato kidei ki district kiba lah biang nadong shadong, ïa kane hap ieh ha ka jingshim bishar jong ki paidbah nongshong shnong jong ka jylla.
