Tura, Nailar 24 : La nang kynton ki jingshah pynngat kyndon jong u Bernard Marak MDC ka BJP na Tura, namar ki pulit ka West Garo Hills ki la rejister case biang pyrshah ïa u mynta ka sngi 23 tarik namar u la pyndonkam da ka seng Meghalaya Chamber Commerce (MCC) ban lum pisa beaiñ na ki nongkhaïi bar jylla na ïew Tura bad kane ka jingleh jongu ka la ktah bad shah khniot beiñ ki paidbah namar kine pat ki nongkhaïi ki la pynkiew dor ïa ki mar bam mar dih bad ki tiar ki tar ha ïew Tura.
U SP ka West Garo Hills u Vivekanand Singh Rathore u la ong ba ha ka jingtohkit la lap ba ka MCC ka dei ka seng jong u Bernard bad ka leh ïaki kam lum pisa beaiñ da ki lak tyngka na ki trai dukan kum ka bai rung dkhot bad pynthymmai dkhot hapoh katei ka seng.
U Rathore u la ïathuh ba ki la bun ki jingujor ba la ïoh na ki paidbah la katto katne por halor ki jingkiew dor ki mar bam mardih ha ïew Tura naduh ki biskit, ki soh, ki jhur, pylleng, doh bad kumta la shim khia bad ki pulit ki la tohkit namar ba la bthah naduh ki heh pulit na Shillong.
Ha ka jingtohkit la lap ba ki nongbylla sngi, ki nongtrei ïing, kiba duk ba kyrduh ki la ïakynduh shisha ïa ki jingeh kiba khraw na kane ka jingpynkiew dor ha ïew ha hat bad ka daw ka dei na kane ka jingleh ka MCC.
U la ïathuh shuh ia kane la leh da ka jingbthah jongu Bernard N Marak ba la tip da ka kyrteng sin kum u Rimpu bad la ïarap ïa u da u Wilver Danggo M Marak, Anish M Sangma, Patcheng T Sangma lem bad kiwei bad ïa ka pisa ba la ïoh lum la ïa sam para ma ki.
Nalor kane kine ki dkhot kane ka MCC ki la bthah ruh ïaki nongkhaïi bar jylla ba ki dei ban ïoh ïa ka NOC na u Bernard na ka bynta ban pynthymmai ïa ki Trading License jongki bad hangne ruh ki la dawa pisa na kine ki nongkhaïi tang ban ïoh NOC.
Dei hadien ba ki pulit ki la lap ïa kine kiei kiei baroh ba ki la rai ban rejister case pyrshah ïa u Marak bad ïa ki dkot ka MCC. ïa ki dor ki mur ha ïew Tura ruh la pynmih da kiba thymmai khnang ban ym shah ktah shuh ki paidbah.
