La nang khlaiñ ki seng kur, ha kylleng ka Ri u paid khasi baïar, ka jaitbynriew Khasi ruh kan neh

Ha kine ki sngi, ngi ïohi, ba ki seng kur, ki la nang pynïar ïa ki shnat treikam jong ki, ha kaba lada peit sha kylleng ka ri u paid Khasi baïar, ba ki la nang pynïar ïa la ki jong ki thapniang bad katei ka dei ka dak, kaba ai jingkyrmen, ïa ka lashai jong ka jaitbynriew hi baroh lang, namar ba ka kur, ka dei kaba tehsong ïa ka jinglong kawei jong ka jaitbynriew Khasi baïar.
Dangshen ka Khasi District Council, ka la pynmih ia ka jingpynbna paidbah, ba ki seng kur, ki dei ban leit ban pynithuh ïalade sha katei ka Council, katba kum ki kyndon jong ka lineage bill bad ka Council, kam dei ban pynheh tang ka ktien, hynrei, ka dei ban pyni bad ki kam bad kata ka long, ba kam biang, tang ban shu pynmih ha ki kotkhubor, hynrei, ba kan thung da ki briew kiba lah ban nang wad shuh shuh ia ki kur, kiba rit bad kiba lah ban nang duh jait noh, ha ki snem, ki ban sa wan.
Ka mat ka long kaba ïar shibun bad ki don bun ruh kiba lyngkot jingmut, kiba lah ngiah bad ki bym bang shuh ban ïatai ïa katei ka mat bad ka dei na katei ka daw, ba ki la kynriah noh ïalade, na ka jinglong kur bad ki la shim ba ka jingïadei shikur, ka dei beit tang shi ïing bad ka dei na kata ka daw, ba ki sa mih kiba ai jait kpa, namar ba ka jait kpa, ka dei beit tang ka kam shi ïing jong ki shijur bad ki khun jongki, hynrei katei kam lah ban neh slem ne ban pyni, ba ka dei ka dustur riti jong u paid Khasi baïar.
Haba ki seng kur, ki la sdang ban khie im biang, kaba donkam, ba kin pyni, ïa la ka jong ka iktiar, ka dei halor ki lai tylli ki bynta ba kongsan bad kita ki long (i) ba kin khalah noh shabar jong ka kur ïa kito kiba shim jait kpa bad (ii) ba kin khalah ruh ïa kito kiba shongkha ïa ki khyllah jait bad kiba ai jait pat sha ka kmie bad (iii) ïa kito kiba tuh jait lyngba ki affidavit.
Kine ki dei ki lai jait ki jingpang, kiba la biah phongrai bad pynïap tram ïa ka jaitbynriew Khasi pnar jong ngi, namar ba ki seng kur, kim shym la phikir bha, ïa kitei ki kam thombor na ki riew shim kabu bad ka la dei ruh ïa ki kur, ba kin nym sngewhun ban shu khot kyllum ïa ki, da kano kano ka jait, hynrei, ba kin da thoh thikna ïa la ka jong ka jait ba pura bad ïa katei ngi dei ban ai burom ïa ka seng kur Thabah, ha kaba ka la bthah ïa la ki jong ki kur, ba kim dei shuh ban kam Lyngdoh ïalade, hynrei ba kin ai beit da ka jait Thabah.
Ka jingskhem jong ka jaitbynriew, kam shong satia ha ka saiñ pyrthei, ha ka niam, ha ka jingkhie spah, hynrei ka dei beit ha ka jingteh skhem ïa ka longkur longjait, namarba haba la sniew ka longkur longjait, kumta ki jing jyrsieh kiba har rukom ki ïai jia na ka por sha ka por bad ka dei kane ruh, kaba pyntroin shibun ïa u paid Khasi baïar ha kine ki sngi.
Ka jinglong kongsan jong ka seng kur, ka dei ba ka lah ban tehlakam ïa ka shongsang ha ka shongkha shongman, ha kaba u kni um lah ban shong tnga ïa la ki pyrsa, u hynmen um lah ban ïa poikha bad la ki jong ki para, ar lane lai kmie bad kam dei tang katta, hynrei haba ka jot ka pra ka shongkha shongman, ha ka pang ka shitom, ka duk ka kyrduh bad wat ka ïap ka im, ka don ka jingïateh bad ka jingïabeh, halor ka jingsngew trai na ka jinglong kur.
Ban pynkut, ngi dei ban kynmaw, ba ka seng HYC, ha u snem 2018, ka la lah ban pynduh ïa ka jingshim jait Khasi, jong kawei ka longïing kaba shongkha ïa ki Singhania bad lada katei ka sengbhalang, ka lah ban weng ïa katei kawei ka longïing, kumta katno tam, lada ki seng kur, ki shim ïa ka jingkitkhlieh dalade hi.