La nang jyllei ki khyrdop lum pisa ha surok bah naduh ba shimti ka VPP ha KHADC ong u heh ka Congress

Shillong, Naiwieng 11 : U Nongïalam ka Congress ha kane ka jylla uba dei ruh u MP ba rim u ma Vincent H Pala u la ther tyngeh ïa ka jingnang jyllei shuh shuh ki khyrdop lum pisa ha ki surok bah naduh ba shimti ka VPP ïa ka jingsynshar ha KHADC.
U Ma Pala u la ong ba ka jingdon ki khyrdop lum pisa ki la nang kiew naduh ha synshar ka VPP ha KHADC. U la ïathuh ba la mih sa 10 tylli ki khyrdop lum pisa thymmai nalor ki 24 ne 25 tylli kiba la don lypa bad kane ka long ka jingban bein bad jingdawa pisa ba shyrkhei na ki nongniah trok. Kane ka dei kawei na ki kam bamsap ba jur tam ong u ma Pala.
U la ong “ Kine ki khyrdop ha ki por ba mynshwa ki long kum ki ATM ïa ka NPP bad BJP bad mynta pat ki la dei ki ATM ne ki tyllong pynmih pisa ïa ka VPP khamtam da kane ka jingïai pynbun shuh shuh ïa kine ki khyrdop. Mynshwa ki khyrdop district council ki don kumba 24-25 tylli hynrei naduh ba la shimti ïa ka jingsynshar da ka VPP ha KHADC ki la mih sa shiphew tylli ki khyrdop ba thymmai bad kane ka la nang ktah jur ïa ki nongniah trok bad ïa ki paidbah. U la ong ki paidbah kiba shah ktah jur eh namar da ka jingbun kine ki khyrdop lum pisa ki dor ki mur jong ki mar ki mata ki la nangkiew ha ïew ha hat.
U la ong ha Shillong Bye Pass man la ka 20 Km la mih ki khyrdop lum pisa bad ha Jowai Bypass pat man la ka 7 km la mih beit ki jaka lum pisa.
U la ong dei ban buh da ki kyndon ïa ka rukom pynmih ïa kine ki khyrdop hynrei kaba lyngngoh ka long ba ka sorkar kam leh ei ei halor kane. U la ong ba ki weighbridge ruh ki bun ha Meghalaya bad kine ruh ki shu lum pisa beit na ki trok khlem ki jingthoh jingtar ne khlem ki receipt kumba long ha Mukhla, Khliehtyrshi bad Umling. U la kren bynniaw ruh halor ka jingshah pyndik bad shah shoh na ka por sha ka por jong ki driver trok kiba nabar ka jylla namar kiba pli kim tip satia shaphang kine ki jingmih kine ki khyrdop lum pisa. U la ïathuh ba ka Congress kan sa pan da ka RTI halor kane ka jingdon kine ki khyrdop kiba shu mih ban dawa pisa bad bamsap na ki trok. U la ïathuh ruh ba ka don ka jingthmu wat ban ujor ïa kane ka kam sha ka ïing bishar. “ Ka Party kan sa pan RTI shen ha lor kine ki khyrdop lyngba ka kynhun ba ka la thung kyrpang kiba dei ki riew stad aiñ suda. Kane ka kynhun kan pan RTI ruh ïa ki weighbridge namar ki nongñiah ki ujor ba ki hap ban siew 2000 tyngka ha man la kawei pa kawei ka weighbridge. Ka Congress kan ïai bud dien ïa kane ka kam haduh ba kan da lah ban rat ïa kane ka jingbamsap na ki surok bah pynkut u ma Pala.