Shillong, Rymphang 21 : U Myntri ka Tnad Pule Puthi u Rakkam A Sangma ha ka sngi Balang, ula pyntip ba ka Sorkar Jylla ka la pynïaid shaid shaid ïa ki jingpynkhreh baroh ban pynlong ïa ka Captain Williamson Sangma State University ka ban treikam.
Haba jubab hapoh ïing Dorbar, u Rakkam ula ong ba ka Sorkar ka la pynkhreh mynta ban mang sa 100 tylli ki kam nonghikai ha Tura bad 6 tylli ha Shillong Campus.Ka jingmang pisa ban pynlut ïa kane ka long T.45.7 klur shisnem.
Ula pyntip ba ka kam ban thung ïa u Vice Chancellor jong ka State University ka la jan poi ha ka bynta kaba khatduh eh. U ong ba ka jingthmu hi ka long ban pynlong ïa kane ka State University kaba treikam noh hapoh u 2024.
Hynrei, namar ka jingwan jong ka elekshon Lok Sabha, lada ym lah ban thungkam ïa baroh ki nonghikai kane ka State University kan hap sdang treikam noh naduh u 2025.
Nalor kane, u Myntri ula pyntip ba ka pisa ba 16.96 klur tyngka la dep ban pynlut haduh mynta halor ka jingpyntrei ïa ki jingtei jong kane ka University.
Ula ïathuh ba ka jingtei ïaka Administrative Block bad Academic Block nalor ka jingtei ïa ki Hostel ki Shynrang bad Kynthei kila dep mynta.
Haduh mynta, 56 tylli ki kam la dep ban mang ba kynthup ïa u Vice Chancellor bad Registrar. U pyntip ba ka Sorkar kala dep mang ruh ban shna ïa ka surok shapoh ka University lem bad ka jingpynpoi ïa ka umbam umdih.
“Ngi la dep thung ïa ka Board of Governors. Ka jingïalang ba nyngkong jong ka Board of Governors ka la long ha ka 14 tarik Kyllalyngkot 2022 bala pynïaid da u Myntri ka Tnad Pule Puthi” ula bynrap.
