Khliehriat Lber 12: U samla Lamswa Papeng, 24 snem kyrta uba na ka shnong Mynthlu East Jaiñtia Hills District, u la jah khlem wanphai ïing shuh naduh ka miet jong ka 9 tarik mynta u bnai Lber. Utei u samla u la jah lang bad ka kali pickup kaba u ñiah bad ka dei ka kali kaba la shim wai da ka company Star Cement Lumshnong bad dei ha ka 10 tarik ki ba ha ïing ha sem lem bad u trai jong ka kali ki la leit buh da ka ejahar ha Umpleng Police Outpost.
Na ka liang ka kmie jong utei u samla ba jah, ka kong Merisda Papeng ka la iathuh ba u khun jong ka u Lamshwa u dang ïakren phone bad ka myn ha ka miet jong ka 9 tarik ha ka por 9 baje tam mynmiet bad ha katei ka por u la iathuh ha ka ba u la poi ha shnong Moopala namar ba u dang wanphai na ka jaka trei na Star Cement Lumshnong, ka la ong ruh ba utei u khun um ju wan sha ïing man ka sngi namar ba u ju sah beit sha jaka trei sha copmay Star Cement bad u ju poi tang shi sien ne ar sien shi bnai ban wan ai bai bam ha ïing ha sem kata ha ïing lok bad ha ïing kmie.
Na ka liang kiba ha ïing ha sem jong u samla Lamshwa Papeng kynthup ruh ka kmie, ki la kyrpad ban pan ka jingïatreilang jong ka company Star Cement ba kan sngewbha ban ai ka jingiatreilang lem bad ki bor pulit, kumjuh ruh bad ka shnong Mynthlu ha ka jingwad shnong ïa utei u samla uba la jah naduh katei ka miet.
La ong ruh ba u la sdang ban ñiah ïa katei ka kali mynta ym pat dap shi bnai ruh, ka kali ba u ñiah ruh ka dei ka kali pickup kaba dang thymmai kaba ym pat don number.
U samla Lamswa Papeng u dei u khun ba nyngkong jong ka kong Merisda Papeng bad u kpa u bah Pyrkhatlem Chyrmang, ki ïa don hynñiew ngut shipara lai ngut ki shynrang bad saw ngut ki kynthei, u la poi shongkha ha ka shnong Jalaphet bad u don iwei i khun kynthei iba dang ioh 1 snem 2 bnai.
Na ka liang u Additional Superintendent of Police East Jaiñtia Hills District, u bah S.Pasleiñ, MPS, u la iathuh ba na ka liang ki bor pulit ruh ki la shim khia ha kane ka kam bad ki dang wad mynta ban lap pat ïa u samla Lamshwa Papeng bad ka kali kaba kaba u ñiah kaba la jah lang naduh katei ka miet. Na ka liang ki heh pulit ki la bthah ruh ïa ki incharge jong ki police station, ki police outpost ba kin leit ruh sha ki jaka ba don ki cc-tv kum ha ki petrol pump bad ki dukan ban lap ksai, la bthah ruh ïa baroh ki thanat kiba don ha ka thaiñ shatei lam mihngi ban sngewbha ban iarap ban ïa wad lang ïa utei u samla uba jah.
Na ka liang ka ïing ka sem ka kyrpad ba lada don mano mano ba iohi ïa u ba kin sngewbha ban pyntip sha kiba ha ïing da kaba phone ha u number 8787857531.
