La kynjoh 17 snem ka jingdawa Scholarship, hynrei ka sorkar kam ithuh ïa ka Niam Tynrai
![](https://mawphor.com/wp-content/uploads/2022/12/Khasi.jpg)
Nongstoiñ, Nohprah 5: Ka Seng Khasi kaba dei kawei na ki Niam tynrai jong u khun Khasi khara kaba dang bat ïa ki riti ki dustur jong u mynnor, kaba long ruh kum kawei ka dur kaba pynithuh sha ka pyrthei hi baroh kawei, ïa ka jinglong tynrai bad ka jinglong kyrpang jong ka jaidbynriew hapoh ka bri u Hynñiewtrep.
Phewse, ha kane ka juk kaba la shai bad kaba la nang la stad, ka sorkar Meghalaya kam sngewthuh ïa ka jinglong kordor jong ka riti ka dustur jong u khun bynriew, haba wat ki jaidbynriew bapher bapher kiba na satlak jong ka pyrthei ki la khohreh ban wad ïa la ka tynrai.
Lah ban ong ba kiba bun na ym shym la shem shuh, wat haba ki thrang ban tip bad ban ithuh lada lap. Pynban na ka bynta kiba dang don, kiba dang bat bad kiba dang tip la tynrai, hynrei la pyrshang ban pynduh pynban da ki katto katne ki briew kiba shit niam bad ka sorkar ruh kam ithuh satia ïa ka.
Ki por ki la leit bad ki snem ki la tyllun na uwei sha uwei pat u snem, ha kaba la ïohi ruh ba kane ka niam tynrai ka la sdang ban long kum ka niam rit paid ha la ka Ri. Kumta ban lait na ka jingduh jaid namar ba la ïohi ba ka jaidbynriew ka la sdang sakma, ka seng da kawei ka jingmut ban pynskhem shuh shuh ïa ka jinglong kyrpang, khnang ba ka pyrthei kan sakhi lang ïa ka jingtip jong ka mynnor.
Ka seng haba ïadei bad kane ka phang, mynta la kumba 17 snem ei ei ka la ju kyntur bad dawa ïa ka Scholarship kaba kyrpang na ka bynta ki khun ki hajar jong Niam Tynrai. Hynrei haduh mynta kim pat ïoh, namar ka sorkar Meghalaya kam pdiang satia. Hato kane ka dei ka jingleh shilliang bad la ñiew beiñ ha kane ka jylla, tang namar ba ki dei kita ki Niam rit paid. Lane hato kadei ka jingshah iuhroit ? ne kim don hok ban ïoh ïa ka ?.
Haba ïadei bad kane ka phang, u bah P.Ryntathiang President ka Seng Khasi West Khasi Hills District, u la ong, “Ka seng ka la ïaid lynti mynta la kumba 17 snem ban dawa ïa kane ka bhah, kaba dei ka hok katkum ka jingbthah ka ïing bishar kaba ha khlieh duh jong ka Ri India. Hynrei ka sorkar Meghalaya pat kam shah shkor satia bad ym don ruh ban tuklar lem halor kane ka bynta”.