La kut ka ot kilo ha ki ïew buh thong ka EM ban pynkut ïa ka jingleh benami

Shillong, Nohprah 19 : Ka Dorbar Tlang jong ka KHADC ha kane ka sngi Palei ka la ai ka jingmynjur ïa ki kyndon treikam (Rules) jong ka Khasi Hills District (Establishment, Management and Control of Market Rules 2024 kaban teh lakam ïa ka die ka thied ha baroh ki iew kiba hap ha u pud u sam jong ka Council.
Ïa kane ka Rules la wanrah da ka Executive Member ba dei peit ïa ka tnad Market, Kong Grace Kharpuri ha kane ka sngi sdang jong ka Dorbar Tlang na ka bynta ban ïoh ïa ka jingmynjur.
Hadien ba ka Iing Dorbar ka la ai ka jingmynjur, kane ka Rules mynta ka lah ban pynkut noh ïa ka jingshah khate kilo ki mar rep ha ki iew ki hat bad ruh wat tehlakam ïa ka benami.
Na ka liang ka Executive Member haba kren bad ki lad pathai khubor ka la ong da ka jingïoh ïa ka Market Act ryngkat ka Rules, ym tang ki nongrep kiban myntoi hynrei wat ki nongkhaii ruh kin myntoi lang.
“Ka thong ba hakhmat ka long ban pynkut syndon ïa ka jingshah khate kilo ki mar rep da ki nongkhaii bad ruh ha kajuh ka por ban tehlakam ruh ïa ka jingleh benami ha ki dukan ha ki iew ki hat,” ka la ong.
Ha kajuh ka por, ka Kong Grace ka la ong ruh ba katkum ki kyndon ki nongrep haba ki wanrah ïa ki mar rep jong ki sha iew ki dei ban pyntikna ba ki mar jong ki kin long kiba biang, kin ym dei kiba jhieh khnang ba kan ym don ka jingïakhnium hapdeng ki nongrep bad ki nongkhaii.
“Lada ki leh kumta, ka rukom thew kan ym bakla bad kan ym wanrah ka jingduhnong ïa ki nongkhaii ruh. Hangne ngi pynsting lang ïa ka jingeh jongki nongkhaii kaba ki ju ud na ka por sha ka por bad khamtam ïa ki nongrep ruh ban pyllait na ka ot kilo,” ka la ong.
Haba kren pat halor ka jingïakhun pyrshah ïa ka benami, ka la ong ruh ba la kdew shai ba ki trai dukan ki dei ruh ban rejistar bad man la u snem ki dei ban wanrah ïa ki kaiphod sha ka Executive Committee lyngba ka sub-committee kaba ka market managing committee kan thaw.
“Ngi hap ban teh lakam ïa ka benami kaba la jyllei bha ha ka jylla jongngi. Lada ki wan rejistar ngi lah ban lap bad kumta lada ki wan ki bym dei Khasi ki hap ban aplai ïa ka Trading Licence,” ka la bynrap biang.
Lah ban kdew hangne ba hadien ba u Lat u la ai ka jingmynjur ïa ka Market Act dang shen, na ka liang ka EM ka la pyntip ba mardor hi kum ka tnad ki la pynbit pynbiang ïa ki Rules khnang ba kin lah ban pyntreikam noh ïa kine ki kyndon ha ki iew ki hat.
Na ka liang ka EM ka la pynpaw ruh ba ki khmih lynti ba da kane ka sienjam ba ki shim kan wanrah bad pynbeit lang ïa ka jingeh jong ki nongrep bad kumjuh ïa ki nongkhaii khnang ba kan ym wanrah ka jingduhnong ïano ïano ruh.