Nongstoiñ, Lber 27: Ka District Magistrate ka Eastern West Khasi Hills District, Mairang ha ka hukum ba la pynmih ha ka 24 tarik u Lber 2025 katkum ka Section ba 163 BNSS, 2023, ka la mana bad pakhang ïa ka jingtih shyiap hapoh rud wah bad sawdong jong ka jingkieng Umthied Bynther lyngba ka shnong Lyngdoh maram, khlem ka jingïoh jingmynjur na ka Ministry of Environment & Forests, Government of India lane na ka State/District Environmental Impact Assessment Authority.
Ka District Magistrate ka la pynmih ïa kane ka hukum, hadien ba la ïoh jingujor halor ka jingdon jong ki briew kiba tih shyiap beaiñ khlem laisen bad ka long ruh ba pynkheiñ ïa ka aiñ National Green Tribunal (NGT), kaba la pynmih haka 5 tarik Nailar 2013, da kaba pyndonkam ruh ïa ki kor ki bor ban pynkhuid ïa u shyiap ba lah dep tih, namar ba kane ka jingleh ka long beaiñ bad ka buh jingma ïa ki doh um doh wah ha ki wahduid bad wah bah ha kitei ki jaka.
Kane ka hukum ka la treikam naduh u 24 tarik Lber 2025 bad lada lap ïa kino kino kiba pynkheiñ ïa kane ka hukum kin shah pynshitom katkum ka kyndon aiñ 223 jong ka BNS, 2023.
