La kem 1600 ngut, kurup 323 ki kali, kurup palat klur ka pisa ha ka thma pyrshah Drok

Shillong, Rymphang 21: u Myntri Ranghah ka jylla, u Conrad Sangma, u la ïathuh ba ka sorkar bad kumjuh ruh ki Pulit ki la trei borbah ha ka thma pyrshah ïa ka jingsniew jong u drok.
Haba jubab ïa ka jingïatainia halor ka jingkren lamphrang u Lat, u Myntri Rangbah u la ïathuh ba ki Pulit haduh mynta ki la la oh kem palat 1600 ngut ki briew kiba donkti kam khaïi drok. La register case palat 800 tylli bad la chargesheet palat 696 tylli. Nangta la ïoh kurup palat 40 hajar Gram u Ganja, Palat 11 hajar Gram u Opium. Nangta la ïoh kurup ruh 323 tylli ki kali, nangta ki mobile phone bad kumjuh ruh la kurup palat 1 Klur tyngka ka pisa.
Kane ka pyni ba haduh katno na ka liang ka tnad pohïing bad ki Pulit ki la trei shitom ha ka jingïakhun pyrshah ïa u drok. Hynrei ha kajuh ka por u la ong ba kam long kaba suk ban ïakhun pyrshah kine ki jingsniew, namar kadei ka kam kaba pynïohnong shibun ïa ki briew bad ki briew kin ïai leh bad ïabeh sha kane ka kam kamai.
U la ong ruh ba ka jingïaleh pyrshah ïa u drok kam kut tang ha kaba kurup bad kem, hynrei dei ka bynta ruh jong ka jingïasyllok, ka jingthaw thymmai ïa kito kiba donkti bad kiwei kiwei de ki prokra. Dei namar kane ka daw ba ka sorkar ka la pyntreikam ïa ka Dream Project, ha kaba yn lah ban ïalam lynti ïa ki samla bad kito kiba ngop ha ki kam dih drok ba kin ïoh ïa ka jingim ba thymmai.