La jied ïaki nongïalam ba pura ka Synjuk ki Rangbah Kur Ri-Bhoi ban tehsong ïaka kur ka jait
Nongpoh, Naitung 20: Ka Synjuk ki Rangbah Kur ka Bri u Hynñiewtrep mynta ka sngi kila wan ban pynskhem ïaki nongïalam ba pura jong ka Synjuk ki Rangbah kur Ri-Bhoi District naka bynta ban tehsong ïaka longkur longjaid ha Ri-Bhoi District bad khamtam ban wanrah ka jingtylli jong ki kur.
Ïa katei ka jingïalang ban pynskhem ïa ki nongkitkam ba pura jong ka Synjuk ki Rangbah Kur la pynlong ha iing Dorbar Iewmawlong bala wan ruh ban pynskhem da u Bah RL Kharpran President ka Synjuk ki Rangbah Kur ka Bri u Hynñiewtrep haka jingdon lang kiwei kiwei ki nongïalam.
Ki nongialam ba pura kane ka synjuk ki Rangbah kur Ri Bhoi ba la pynskhem mynta ka sngi ki kynthup ïa u Bah Donbok Khymdeit, bad u Bah Ploster Syiem kum ki Adviser, Bah R.R Kynsai Makdoh President, Bah Coming Myrsing bad u Bah Shandra Nongkseh kum ki Vice President, Bah Rudolf Born Makri Secretary, Biolking Tmung bad u Biestar Sylliang kum ki Joint Secretary, Bah R. Brister Shada Treasurer bad kiwei kiwei.
Haba kren sha ki lad pathai khubor, u Bah R.L Kharpran kum u President ka Synjuk ki Rangbah Kur ka Bri U Hynniewtrep, u la ong ba ka synjuk ka dap da ka mynsiem jong ka jingkmen hadien ba la ioh ban pynskhem pura ia ki nongialam ka Synjuk ki Rangbah Kur Ri Bhoi bad ka jingsngewkmen ruh ka long ba naduh u snem 2019 naduh ba la seng ia kane ka synjuk ka don ka jingkyrshan na ki paidbah katba shaba ki leit ban lum ban lang na ka bynta ban tehsong ia ka kur ka jaid hapoh ka bri u Hynñiewtrep.
U la ban jur ruh halor ka jingdonkam ban pyntreikam noh ïaka Clan Bill jong ka KHADC naka bynta ban tehsong ïaki kur ki jaid namar kino kino ki ba pynkheiñ kin shah pynshitom katkum ki kyndon jong ka aiñ.
U la khot bad wer ruh ia ki para jaid bynriew ba ki dei ban ia snoh kti lang ha kaba pyntreikam ia kata ka longkur ka longjaid bad kum ki kur ki dei ruh ban don kata ka Dorbar Kur kaba khlain, khnang ban lah ban pynneh ia ki riti ki dutur bad ia ka jinglong kyrpang ka jaid bynriew tip kur tip kha bad kaba tip ia ka longkur ka longjaid.
Na ka liang u Bah Rangkynsai R.R Makdoh kum u President ba thymmai ka Synjuk ki Rangbah Kur Ri-Bhoi haba kren sha ki lad pathai khubor, u la ong ba ka long kaba donkam eh ban tehsong ia ka longkur ka longjaid khnang ban im ka jaid bynriew bad kaba kham kongsan ngim dei ban klet ia la ki riti ki dustur khamtam ha Ri Bhoi ba la ia khleh lang bun ki jaid bynriew.