La jan dap ar taïew ka jingshah khang tala ka Toll Gate ha Lumshnong
Ym pat maramot ka NHAI ïa ka surok NH-6 ha Narpuh
![](https://mawphor.com/wp-content/uploads/2023/08/toll-Copy.jpg)
Khliehriat, Nailar, 20: Ka jinglong jimgman ka surok national highway 6 ha East Jaiñtia Hills District khamtam ha ka thaiñ Narpuh, ka dang long hi kumjuh, ha kaba ka National Highway Authority of India (NHAI) kam pat shym la shim khia eiei ban maramot thikna ïa ka surok ha Narpuh kaba la jot rathai bad buh jingeh ïa ki nongliet nongwan.
Ki thymmei kubor ki ïathuh ba ki don ki jaka ba la maramot tangaba ki nongtrei ka NHAI ki la shu wan ban theh tang da ki maw bad ka khyndew, kane ka la nang pynjyrsieh shuh shuh ïa ka surok bad buh jingeh ïa ki kali kiba ïaid.
Dang myn ha ka 8 tarik mynta u bnai ki paidbah jong ka thaiñ Narpuh hapoh ka jingïalam ki waheh shnong bad ka KSU Narpuh Circle, ki la ïa mih paidbah ban pynlong ïa ka jingpakhang surok kaba hynriew kynta kum ka dak ban pyni ïa ka jingbitar jong ki ïa ka sorkar bad ka NHAI kiba la shu leh mynthi bad leh byn salia ban maramot ïa ka surok, ha katei ka sngi ki paidbah ki la khang tala ruh ïa ka jaka lum pisa ka NHAI ka Toll Gate Plaza kaba don ha Lumshnong bad kat haduh mynta la jan dap ar taïew katei ka jaka lum pisa ka NHAI ka dang shah khang tala, ka sur jong ki paidbah ka mih bad sawa ba ym bit ban plie ïa ki tala ha katei ka toll gate lada ka sorkar nad ka NHAI kim pat maramot bha ïa ka surok.
La lap bad la sakhi ruh ba ki don bun ki bynta jong ka surok ha ka shnong Mynkre, Lumshnong, Tongseng, Sonapydi ter ter shaduh Ratacherra kiba la jot bad julor shaba palat bad kiba la buh jingma ïa ka jingim briew bad ïa ki kali kiba leit na wan. La lap ba ki jingkieng ki ladap da ka um ktieh bad paw sa tang ki nar rot shabar. Kine ki nar rot ba paw shabar ki buh jingma bha ïa kali ba ïaid bad ki lah ruh ban wanrah ïa ka jingjulor ki kali khamtam ki kali rit ki ba hap ban shu ngam na ka um ktieh. Kane ka jingjot rathai jong ka surok ka la pynsyrtok haduh katta katta ia ki paidbah kiba la ngiah hi shoiñ haduh ryndang.
Ki nongïalam jong ka Khasi Students Union na Narpuh , ki Waheh Shnong na Narpuh bad ki paidbah ki la byrngem ba lada ka sorkar bad ka NHAI ki dang leh mynthi kin hap ban mih madan biang ban pynlong ïa ka jingiakhih paidbah na ka bynta ka surok.
Kum ban shu phai dien, u Manager technical jong ka NHAI, u Biswa Jyoti Lahkar, myn ha katei ka 8 tarik u la kular hakhmat ki paidbah jong ka Narpuh ba ki nongtrei jong ka NHAI kin sa sdang noh mardor ïa ka jingmaramot ïa ka surok, hynrei mynta la jan dap ar taïew ruh ym pat shym la ioh dak eiei ban maramot ïa ka surok ha Narpuh.
Kum ban shu bynrap, kane ka jinglong jingman ka surok ha Narpuh, ka buh jingeh ruh wat ïa ki kali kit nongpang ha kaba ki hap ban iaid na kaba kum kane ka surok da kaba hap ban ngam na ka ktieh, na ki thliew bad na ka jyrsieh ha surok bad don ruh ki por ba jia ka jingdheng kali ba khah khah ha ka thaiñ, na ka daw ka surok ba sniew, kane ka buh jingeh bha ïa ki kali kit nongpang.
Na ka liang u President KSU Narpuh Circle, u bah K.S.Suchiang u la ong ba ki paidbah ki sah ha ka umdum namar kane ka jingleh mynthi ka sorkar bad ka NHAI ban maramot ïa ka surok bad bynrap ruh ba ïa ka toll gate hap khang beit mynta haduh ban da maramot bha ïa ka surok ha Narpuh.
U la ong ruh ba man la ka por, wat ha ki snem kiba la leit ruh, ki nongtrei ka NHAI ki ju ai daw ba ka dei ka aiom slap ym lah ban maramot, hynrei haba la kut ka aiom slap slap ruh ka NHAI kam ju shim khia ban maramot ïa ka surok, mynta ka kynti na ka liang ka seng bad ki waheh shnong kin bud dien ïa kane ka jingmaramot ïa ka surok, kata ynda la kut bha kane ka aiom slap.