Shi kyntien lada ong dheng kali, kamut beit ba ka don ka jingsahkut kali kaba la ktah ia ka leit ka
wan la ka long naduh ki kali kiba hiar haduh ki kali kiba kiew. Ka jingmih ka dheng kali ka don beit ïa ka daw bad bunsien hi ka dei nyngkong eh ka jingïaknieh ban poi nyngkong khlem da thew la ka long ïa ki kali arshaka lane ïa ki kali saw shaka bad wat ïa ki kali heh ruh. Kane ka jingkyrkieh ban tynruh kat naba lait la ka long na kadiang ne kamon ym tang ba ka nang pynsyrtok shuh shuh ïa ka dheng kali hynrei ka buh jingma bad jingsyier wat ïa ki nongleit nongwan kiba dang ïaid kjat lane wat ïa kito kiba thmu ban hiar na kali.
Kane ka jingpang kwah poi nyngkong ka la pynjah ïa ka burom ka akor jong ka nongbah Shillong bad ka pynlong wat ia ki riewdonburom kiba niah kali ban kum hylla bad kyrkait lang. Don ki khep ba wat ki nongïaid kjat ki hap ban da pyrkhat 100 sien wat ban kam na shilliang sha shilliang namar ka jingjyllei palat kine kiba kwah poi nyngkong. Kane ka rukom niah ba thymmai ïa ki kali arshaka bad kali saw shaka ka la buh jingma ym tang ïa kiwei ki nongniah kali hynrei wat ïa ka jingim jong kito kiba leh ruh.
Nangta, la sngewdei ruh ban kyntu ïa ka tnad pulit pynïaid kali ba ka dei ban da talasi khah khah ïa kane ka rukom niah ba thymmai khnang ba ki briew kiba lui lui kin ym kylla long ki lanot. Nangta ruh dei ban da tohkit bha kumno ki ïoh laisen haba tang ïa ki ain ki kanun kiba ïadei bad ka rukom shim pass bad ha kano ka jaka kaba biang ban pan pass na kiwei pat ki kali. Hynrei kumba ka long hi lada peit ïa ka rukom niah jong ki la paw thik kumba kim tip satia wat tang shi saphit ruh ïa ki kyndon niah kali.
Dei na kine ki jingïatur ïa tynruh poi nyngkong ba lada jia ba mih ka jingïatynrah pat la nang skhem bad nang syrtok shuh shuh ka jingdheng kali. Kumta, la dei ïa ka tnad ba kum ha nongbah Shillong khamtam naduh Umshyrpi lane na anjalee pump barim ba kin da pyrkhing noh khnang ba kine ki rukom niah kali bad tur bad tynruh katba lap kin ym ïoh lad.
Ha kawei pat ka liang ka Shillong Traffic Police wat ha i bor barit ka la pyrshang kat ha i bor ban weng ïa ka jingdheng kali ha ka nongbah Shillong, hynrei kumba ka paw, ka jingkharoi ki kali ha ka nongbah ka la nang kiew nang kiew katba nang mih ki sngi. Ka jingkharoi ki kali ka la pynsuhsat ym tang ïa ka tnat Pulit hynrei wat ïa ki paidbah nongïaid nongieng kiba ïakynduh mawsiang ha ka leit ka wan namar ka surok ka sah hi kumjuh
Nalorkata, ka jingdon jong ki katto katne ki nongniah kali kiba pynieng kat haba lap ba shem ïa ki kali katba ki sngew bit ka la nang pynsyrtok shuh shuh ïa ki. Ka jingpyntreikam jong ka Shillong Traffic Police ïa u “Khnap” (Clamp) kam pynpei skhor ïa ki nongniah kali namar ki pynieng ïa kali wat ha ki jaka ba la thoh “No Parking,’ kaba wanrah pat ïa ka jingsuhsat jong ki nongniah kali kiba bud ïa ki kyndon aiñ niah kali bad ïa ki nongïaid nongieng. Ka jingbym biang ki lynti ïaid kjat ka buh jingma haduh katta katta ïa ki nongïaid lynti namar ki don ki khep ha kaba ki paidbah ki hap ban ïa synrud lang bad ki kali.
Ka jinglong amriang jong ki nongniah kali kiba pyrkhat tang ïa ka malade ka wanrah ïa ka syrtok ïa kiba bun. Ka daw kam dei namarba kim tip ïa ki kyndon aiñ niah kali hynrei ka dei tang namar ka jingsngew baheh. Ka tnat Pulit watla ka la pynshitom ïa ki nongpynkheiñ da kaba shaiñ kuna bad da kaba pyndait da u Khnap pynban ki paidbah ki dang ïai leh saitlah ïa ki jingmaham bad jingmana jong ka tnat Pulit.
Ka jingailad ban pynieng ïa ki kali shilynter ka surok ka dei kawei na ki daw bah kaba ju wanrah ïa ka dheng kali namar ki don beit ki riewshimkabu ki ban phrung ban pynieng ïa ki kali wat haba ki la ïohi pylleiñ pylleiñ ba wat jaka pynieng kali ruh kam don shuh. Tangba biang ka ïalade shimet, kam pher watla kiwei ki suhsat ne ki khñium. Da ki phew hajar tylli ki kali kiba tyllun ha ki surok jong ka Nongbah Shillong ha ka shi sngi nalor kata, sa ki kali kiba wan na kiwei pat ki distrik.
Kane ka dei ka daw kaba la idonkam haduh katta katta ba ki bor pynïaid skul ki la dei ban pyrkhat thymmmai ban weng ïa ki sohkyrdot da kaba buh noh da ki School Bos kiba mynta la ïohi ba tang khyndiat tylli ki skul kiba pyndonkam ïa ki School Bos namar ka jingbym mynjur jong ki kmie ki kpa khamtam eh ha ki thain Laitumkhrah.
