Shillong, Naitung 15: Ha ka ïing dorbar lyuir kaba dang shu dep hapoh ka KHADC la ïathuh ba naduh ba la ïoh ïa ka Khasi Hills Autonomous District Khasi Social Custom of Linage Act (KHADKSCLA), 1997 ki la don 255 tylli ki jaid thymmai kiba la tang katkum ki kyndon jong katei ka aiñ ïa kaba la mynjur da ka Executive Committee ka KHADC.
Ka Executive Committee ka la buh ïa ki kyndon na ka bynta kito kiba hap ban tang jaid ïa kaba ki hap ban bud ryntih ban pynbiang ïa ki kot ki sla kiba donkam haba ïadei bad kane ka tang jaid katkum katei ka aiñ jong ka KHADC.
Ka bynta kaba kongsan eh ha kaba ïadei bad ka tang jaid ka long, kito kiba tang jaid ki hap ïoh ïa syrnot na u Rangbah kur ba kum ka kur kam don kano kano ka jingujor ha kaba ïadei bad ka jingtang jaid ïa ki khun ki kti kiba kha na ka jingshong kha khleh.
Ka KHADC ka la pyntreikam ïa katei ka aiñ ha ryngkat ki kyndon kaba ka la shna bad ka da buh jingkheiñ ryntih ïa baroh ki kur kiba la dep ban tang jaid ban pynthikna ba kito kiba tang jaid hadien kin nym tang ïa kajuh ka jaid kaba la dep ban don lypa.
