Shillong, Naiwieng, 17: “Ka jingjia ba sngewsih ha kaba uwei u samla u la duhei ïa la ka jong ka jingim bad kawei ka samla ka la shitom jur na ka daw ka jingshah tynrah ha ka kali kaba synran ïa ki longheh lane Minister ka pynpyrkhat ba ka la dei ka por ban pynduh noh ïa ka “VIP Culture” lane ki kali light saw ha ka jylla ka jong ngi shwa ban dang bun kin ban mynsaw,” ong u Working President ka Khun Hynñiewtrep National Awakening Movement (KHNAM) u Bah Thomas Passah ha u kyrwoh ba la phah sha ki lad pathai khubor ha ka sngi u Blei.
Kane ka jingkynthoh jong ka KHNAM ka long hadien ba uwei u samla ïa uba la tip kyrteng kum u H. Rymbui na ka shnong Nongtalang, West Jaiñtia Hills District u la duhei ïa la ka jingim hadien ba ka kali kaba synran ïa ki heh ki haiñ kiba ïabeh ban leit sha ka tamasa Cherry Blossom ha Bhoirymbong ka la syllad ïa ka thukthuk kaba don u nombor ML05-AD-0566 ba shong da u samla H.Rymbui bad kawei ka samla kynthei. Kane ka la jia ha ka por 5:30 baje eiei janmiet ha ka thaiñ Umsaw marjan bad ka ophis ICAR. Ïa kine arngut ki samla la pynkit noh sha Holy Cross Hospital ha Umsaw hynrei ki doktor ki la pynbna ba u samla H Rymbui u la khladnoh na kane ka sla pyrthei.
“Ka Iingkashari ba hakhlieh duh ha ka mukotduma jong u Abhay Singh pyrshah ïa ka Sorkar India ka la ong ba ki light saw ki dei ka “menace” ha ka imlang sahkang. Kiba bun kiba pyndonkam ïa ka light saw, ki Siren bad ki Escort Pulit kim burom ïa ki aiñ jong ka ri bad ki kheiñ dewthala ïa ki paidbah. Ha ka jylla jong ngi lei ki nongbud Minister/MLA, ki nongïalam Political Party ki pyndonkam ïa ka Siren khlem jingsheptieng, katba u paidbah u dang ap syrtok ha ka dheng kali, narud la ïaid baheh kine ki kali pynpah Siren (Private/ML-01) ban dang pyndkheng shuh shuh bad kaba pynishrai shibun,” la kynthoh u Bah Passah.
“Ka ladei ka por ba la hap ban pynduh noh ïa kum kine ki jingleh baheh lane ïa ka “VIP Culture” ha ka jylla jong ngi. Lada kine ki Minister, ki longheh kin sa kut lang ha ka dheng kali lehse kin kham shimkhia ban pyrkhat kumno ban pynduna ïa ka dheng kali, katba kam pat ktah ïa ki, u paidbah un sah ha kajuh ka jingeh na ka dheng kali,” u la bynrap.
“Kum ka seng ngi phah ka jingsngewlem sha ki bahaiing hasem kiba la duh noh ïa ka mynsiem kaba kordor tang namar ba u Minister u la kyrkieh ban leit leh tamasha sha Cherry Bloosom,” la ong u kyrwoh.
“Ngi ïohi ba ki Pulit ki la shim ïa ka ejahar bad la ïaid ka jingbishar, hynrei ngi kwah ban pynkynmaw ba ha kato ka janmiet kaei kaba la jia ka dei ka “hit and run case” bad ki Pulit ki dei ban shimkhia katkum ka Section 106(2) jong ka Bhartiya Nyaya Samhita, 2023 da kaba pynshitom tyngeh ïa kum kine ki briew kiba phet krad hadien ba ki la tynrah ïano ïano,” la kyntu ka KHNAM ïa ki bor Pulit.
“Ngi kynmaw ba ha ki snem ba la leit uwei u nongñiah kali kamai u la kum rung ha pdeng ba dang ïaid ka kali jong u Myntri Rangbah ka jylla bad u la kum pyndei ïa ka kali u Myntri Rangbah bad ki Pulit ki la pynngat ïa u ha ka kyndon IPC “pyrshang ban pynïap”. Te ka jingjylli kaba mih ka long ba kin pynngat IPC 302 (Murder) neem pat ïa kine ki Pulit shakri VIP kiba la shim ïa ka jingim jong u riewpaidbah,” la buh jingkylli ka KHNAM.
“Ngi kwah ba ka tnat Pulit kan pynkloi ïa kane ka kam ym ban pynsuki bad pynklet tang namarba uba donkti u dei na ka kynhun ki Pulit,” ong shuh shuh ka KHNAM.
