La bun kiba wan shim ïa ka Building Permission na ka KHADC
Dang pynkhreh ban pynryntih ïa ki dulir khyndew
Shillong, Jylliew 25 : Ki la don haduh kumba 83 tylli ki Building Permission lane ka jingai jingbit ban shna iing shna sem hapoh u pud u sam jong ka KHADC kiba ka Council kiba la dep ban ai naduh u Kyllyngkot mynta u snem tad haduh mynta.
“Ïa ki building permission la sdang ban ai naduh u Kyllalyngkot 2023 bad haduh mynta la dep ban pyllait 83 tylli ki jingai jingbit,” ong u CEM ka KHADC, Bah Pynïaid Sing Syiem haba wanrah ïa ka Mangtyngka na bynta ka samoi treikam jong u snem 2023-24.
Shwa kane, u CEM u la ïathuh ruh ba ka Executive Committee lyngba ka Jingpyntip Paidbah kaba 23tarik Jylliew 2022 ka la pynbna ïar ba ka Khasi Building and Structure Authority kan sdang ban pyntreikam ïa ka Meghalaya Building Bye-Laws 2021 naduh ka sngi ba la pynbna.
Nalorkata, u ong ruh ba kane ka Executive Committee kan nang ïai pynkhlaiñ ïa kane ka tnad bad khmih lynti ba ka jingïoh lum na kane ka jingai jingbit ban shna iing kan kyntiew ïa ka ïoh ka kot jong ka Council.
Ha kajuh ka por u CEM u la ïathuh ruh ba hadien ba ka Khasi Hills Autonomous District (Regulation and Administration of Land) Act, 2021 ka la long aiñ, mynta ka Council ka la pynstet ban shna ïa ki Rules kiba mynta ki la dep.
“Kaba sah mynta ka long sa tang ban buh ryntih ïa ki jingsiew la ka long ba hap siew ki trai jaka sha ki shnong, ki Raid, ki Hima ne sha ka Council. Nga kyrmen ba ynda la pyntreikam pura ïa kane ka aiñ kan wanrah ïa ka jingbuh ryntih ïa ki dulir khyndew hapoh u pud u sam jong ka Council.