Saitsohpen-Sohra, ïaïong 13: Ka Sohra Cluster (A) bad ka Pongtung Cluster ki la jop ïala ki jong ki jong ki jingïakhun jong ka lympung (L) Benjamin Diengdoh Memorial Under 16 Boys Inter School cum Cluster Cricket Tournament 2025, ba la long ha ka sngi Saitjaiñ.
ïa kane ka lympung la pynlong da ka East Khasi Hills Cricket Association [EKHCA] ha madan Pynshadkhurai Ground, Saitsohpen, Sohra, bad ka la jam mynta sha ka sngi ïakhun kaba saw bad ki don saw tylli ki Cluster (shynrang) kiba ïashim bynta.
Baroh ar tylli ki kynhun ki la jop haba wan shimti ban tied ba ar, ha kaba ka Sohra Cluster (A) ka la jop da 7 wiket ïa ka Mawsynram Cluster, katba ka Pongtung Cluster ka la pynliem da 8 wiket ïa ka Sohra Cluster (B) ha ka jingïalehkai kaba bud.
Ha ka jingïakhun kaba nyngkong, ka Mawsynram Cluster ka la shah pyntied nyngkong hadien ba rem ha ka jingkynting pisa (toss), bad kane ka kynhun ka la lah ban kamai 54/6 haki 12 ober, u Pynkhraw Jomati u la long uba kongsan ha ka tied da kaba kamai 38 ron naki 24 bol. U Gordion Nongkhlaw u la khur 1/5 naki 2 ober.
Ka Sohra Cluster (A) ka la pyndep ïa ka kamram ban kynjoh 55 ron tang haki 6.3 ober bad khyllem 3 wiket. U Nickyland Sangma u la lamkhmat ha ka tied da kaba kamai 25 ron naki 12 bol bad u la khur syndon ïa ka nam Player of The Match.
Ha ka jingïakhun kaba bud, ka Sohra Cluster (B) ka jop ïa ka jingkynting pisa (toss) bad rai ban tied nyngkong hynrei ka la ïohlad ban kynjoh tang 39/5 haki 12 ober (Arky Iangjuh u la kamai 13 ron naki 19 bol, katba u Nobikarson Mawiong u la khur 1/10 haki 3 ober), shuwa ba ka Pongtung Cluster kan tied 40/2 ba ka donkam tang haki 5.4 ober.
ïa ka nam Player of The Match la khur da u Mewanshailang Khongmawloh uba la kamai 17 ron naki 18 bol.
