Shillong, Nailar 06: Hadien jong ka jingkyrshan ki Sengbhalang bad kumjuh u MLA ka Mawsynram u Bah Ollan Sing Suin uy la ong ba na ka liang jong ka NPP Mawsynram ka la ai ka kti ka diang ban kyrshan ïa ka rai jong ka Dorbar Shnong Mawsynram kaba la khang ïa ki niam bapher bapher kiba thmu ban wan lehniam hapoh jong ka Krem Mawjymbuiñ ha ka 10 tarik bad 11 tarik mynta u bnai.
U Nongai ktien jong ka seng NPP u Bah Himalaya Shangpliang uba dei ruh u MLA barim ka jong ka Mawsynram u la pynpaw ïa ka jingkyrshan kaba ratbah ha kaba ïadei bad kane ka rai jong ka Dorabr Shnong Mawsynram.
“Kane ka krem ka dei kawei kaba pawnam bha ha kaba ki nongwan jngohkai ki wan bad ki leit peitkai bad ki leit ruh ban jngohkai bad dei halor kane ba ka sorkar ka la bei tyngka la bun bha ban pynitynnad shuh shuh ïa kine ki jaka bad na ka liang jong ka tnat Jngohkai ka la bei pisa la bun bha bad da ki lak ban pynbhabriew ïa kane ka krem hynrei kam dei pat ban long kum ka jaka mane jongno jongno ,” ong u Bah Shangpliang.
U la ong ruh ba ka thaiñ Mawsynram ka don artylli ki krem kawei ka dei ka krem Mawjymbuiñ bad kawei pat ka Krem Puri bad kine ki dei kiba la kyrkhu da u Blei.
