Shillong, Lber 19: Ka Mary Our Help Training Centre (MOHTC) ka la kynjoh sha kawei ka sienjam ha ki rukom treikam jong ka ban pynïoh ïa ki lad jingmyntoi na ka bynta ki khynnah pule bad ki nongtrei da kaba plie ïa ka jaka thetkti kaba hapoh ka “The Project for the Provision of Water Supply System and Sanitation Facility” ba la bei tyngka da ka Japan Embassy ha India hapoh ka “ Grant Assistance for Grass-Roots Human Security Projects (GGP) kaba dei ka skhim kaba ai sngewbha bad kaba la sdang da ka sorkar ka ri Japan, ban ïarap ïa ka sorkar bad ki seng bhalang bym ïoh jingmyntoi ne ki non-profit organization ban pyntreikam ïa kiba bun ki jingdonkam kum ki tiar ki tar bad kiwei ki jingdonkam hapoh India.
ïa kane ka prokram la pynlong ha ka sngi baar la plie da u Kodero Jiro, Counsellor of Economic Section, ka Japan Embassy ha India kum u kongsan ryngkat ka jingdonlang ka Kawato Akiko, Economic Cooperation Assistant of Japan Embassy ha India, ka Verma Yavanika, Project Coordinator of Grant Grassroot ka Japan Embassy ha India, ka Sr. Elizabeth George FMA, Provincial of Salesian Sisters, Shillong, ka Sr. Helen Puweiñ, President ka Bellefonte Community College bad ki heh ka tnat PHE Lumshyiap, Shillong.
Kane ka jaka thetkti la plie da ka jingthmu ban pynbha ïa ka koit ka khiah ka khuid ka suba kaba long kaba donkam na ka bynta ki khynnah kynthei bad shynrang. Ha kane ka skhim la kynthup lang ruh ïa ki filter dih um bad ka jaka sait kti.
U kongsan haba kren ha kane ka sngi, u la ong ba kane kadei ka jingïadei paralok hapdeng ki briew ka India bad ka Japan bad ka jingïateh kaban dang bteng ha ki sngi ban wan.
Ka jingplie ïa kane ka jaka thetkti kaba thymmai ha Mary Our Help Training Center ka dei ka jingsakhi ïa ka jingtreikam kane ka centre ïa ka bha ka miat jong ki khynnah bad ka jingkiew ha ka pule puthi.
