Shillong, Nohprah 16 : Ka sorkar synrop lang ha ka jylla ka Meghalaya Democratic Alliance (MDA) ka ai ka jingkyrshan ba pura ïa ka rai jongka sorkar pdeng ban pynlong kawei ka Election kawei ka Ri (One Election One Nation) kaba mut ba ha ka juh ka por yn pynlong ïa ka election Lok Sabha bad kumjuh ruh sha ki Assembly jong ki jylla bapher bapher bud sa ki election Panchayat, MDC hapoh shispah sngi.
Halor kane haba ïakren bad baroh arngut ki Symbud Myntri Rangbah ka jylla u bah Prestone Tynsong bad u Ma Sniawbhalang Dhar, ki la pynpaw ba ki kyrshan pura ïa ka rai jongka sorkar pdeng.
ïa kane ka jingtyrwa jongka sorkar pdeng la mynjur da ka Kynhun Myntri jongka sorkar NDA ha ka taiew ba la dep hadien ba la ïoh ka jingai jingmut na ka High Level Committee ba la khlieh da u President ba rim ka ri u Ram Nath Kovind.
Ha ka jingïakren, u bah Prestone uba dei ruh u President jongka National Peoples Party (NPP) ha kane ka jylla u la ong “ Hooid ngam kren na ka liang ka Party hynrei nga kren na kaei ka jingsngew jong nga shimet, nga kwah ban ïohi ba ki election kin long tang shisien ym dei ar ne lai sien la ka dei ka MP ne MLA election ruh namar lada phi kheiñ kyllum ïa ka jingshim por khamtam ynda la pyntreikam ïa ka Model Code of Conduct ka la ktah than ïa ka jingtreikam”
“ Kumta lada ngi don tang kawei ka election ngin sa ïohi ba ngi la ïoh ban tyngkai bun bha ka por hooid lah ban long haduh ar ne lai bnai ruh hynrei da kane ka jinglong election tang shisien ngin duh tang kumba ar ne lai bnai naduh ba pyntreikam ïa ka Model Code of Conduct, hynrei lada ar ne lai tylli ki election kaba duna ruh 45 sngi kawei ka election ka jingduh ïa ka por, lada ar ne lai election khein lang 45 + 45 +45 kumta ter ter hato kam lah ktah jur, kumta ha nga hi shimet nga lah kane kaba pynlong tang kawei ka election.
Kumjuh ruh na ka liang u ma Sniawbhalang Dhar u la ong hi kumjuh lada pynlong bun tylli ki election ka jingduh ïa ka por ka la long palat namar ka Model Code of Conduct hynrei lada tang kawei ka election kam da ktah than bad ki kam pynroi pynpar ruh kim sahteng hynrei kin ïaid beit shaid shaid. Hynrei lada bun tylli te ka ktah jur palat ïa ka jingtreikam jongka sorkar ruh.
