Kyrshan ka RBYF ïa ka sorkar MDA ban pynkhlaiñ ïa ka MRSSA bym pat urlong ka ILP
Dawa ban pyntreikam ïa ka Facilitation Centre ha Umling
Nongpoh, jylliew 15: Ka Ri Bhoi Youth Federation (RBYF), kaba shakri na ka bynta ka bha ka miat jong ki paidbah ha them Ri Bhoi ka la pynpaw ïa ka jingkmen bad ai khublei kyrpang ïa ka sorkar MDA ba la lamkhmat da u Myntri Rangbah ka jylla, u Conrad K. Sangma halor ka rai ba khlaiñ jong ka Sorkar ban pynkhlaiñ shuh shuh ïa ka Meghalaya Residents Safety and Security Act (MRSSA), 2016, ka aiñ kaba la buh kyrpang na ka bynta ban khanglad ïa ka jingwan rung beaiñ ki briew na bar jylla.
Ka RBYF ka la kdew ruh ba kane ka rai jong ka sorkar ka wan hadien ki jingjia sngewsih ha ka jylla, kynthup naduh ka jingshah pyniap u Raja Raghuvanshi ha la ka jong ka kurim ryngkat bad kiwei ki briew nabar jylla bad kum kine ki jingjia ki pyni shai ba ka jylla ka donkam ban don noh mardor ka aiñ kaba khlaiñ ban ïada ïa ka imlang sahlang na ki jingma.
Ha ka jingïakren bad ki lad pathai khubor, u President ka RBYF Bah Bipul Thangkhiew u la ong ba ka seng ka ai khublei ïa ka sorkar MDA kaba la shimkhia ban pynkhlaiñ ïa ka MRSSA, namar ka jingpyntreikam ïa ka Inner Line Permit (ILP) ka dang sahkut ha ka Ministry of Home Affairs jong ka sorkar pdeng.
“Lada ngi don da ki aiñ kiba khlaiñ bad kaba pyndonkam hok, ngin lah ban tehlakam ïa ka jingwan rung laitlan ki briew na bar jylla,” ong u Bah Bipul. U la ong ruh ba lada ka jylla kam don ïa kita ki aiñ ïada, ka lawei jong ki trai ri bad trai muluk ka long ha ka jingma na ka jingshah tyllep bad ka jingshim kabu jong ki briew ba wan nabar.
Ka RBYF ka la pynpaw ba katba ka ILP kam pat treikam, ka sorkar MDA 2.0 ka dei ban pyntreikam noh mardor ïa ka MRSSA ban khanglad ïa ki bar jylla kiba rung lait aiñ bad ban ïada ruh na ki jingjia kiba sngewsih.
Ka RBYF ka la dawa ruh ïa ka sorkar ban pyntreikam noh mardor ïa ka Facilitation Centre kaba la shna ha Umling, kaba la sdang ban pur jyrmie bad kylla iingjah bad lehse lyngba ka jingpyntreikam ïa katei ka Center kan long ka jingmyntoi kaba khraw ïa ka jylla ban peitngor ïa ka rung ka mih jong ki briew kiba wan nabar jylla.