Shillong, Nailar 17: Ka Nazareth Hospital Workers Union (NHWU) katkum ka kyrwoh khubor ba la phah ka la pynpaw ïa ka jingai jingkyrshan ïa ka jingïakhih ki doktor ha kylleng ka ri India ba la ïalam da ka Indian Medical Association (IMA), ha kaba ïadei bad ka jingshah batbor bad ka jingshah pynïap klep kawei ka doktor kaba don hapoh ka kam ban ai jingshakri ïa ki paidbah.
“Ka NHWU ka sngewlem bad ha kajuh ka por ka pynrem ruh ïa kum kine ki riewthrang snam kiba la dkhat noh ïa ka hok longbriew manbriew katei ka doktor da kaba shim noh ïa ka jingim bakordor jong ka. Ka jingthombor ha kano kano ka jaka kadei ka ban pynrem bad dei ban thwet bad pynshitom ïa kine ki riewbymman katkum ki aiñ,” la pynpaw u Bah Kenneth Swer u President ka NHWU ha ka kyrwoh khubor.
Ka Union ha ki jingdawa na ka por sha ka por ka lah banjur ïa ka jingdonkam ïa ka jingkitkhlieh na ka liang ki bor pynïaid Hospital ba kin shimkhia ïa ka leit buh leit on ïa la ki nongtrei khamtam ki kynthei ynda la slem than ka por mih napoh hospital.
“Ka Union ka kyrmen ba ki bor pynïaid hospital bapher bapher hapoh ka jylla kin shimkhia ïa kane khnang ban pynthikna ïa ka jingshngaiñ ha ka leit ka wan ka jong iwei pa iwei i nongtrei,” la pynkut u nongïalam ka NHWU.
