Kyrshan ka HNYF, FKJGP ïa ka jingdawa ka VPP ban pynkylla ïa ka Reservation Policy

Shillong, Jymmang 29: Ki ar tylli ki ki seng bhalang ka HNYF bad FKJGP kiba la pynpaw ïa ka jingbym sngew mynjur ïa ka jingdawa ka VPP ban pynkylla ïa ka Reservation Policy ha ka sngi Nyngkong ka la pynpaw ïa ka jingkyrshan kaba pura ïa ka jingdawa ka VPP ban pynbeit thymmai ïa ka Reservation Policy bad ki la wan jngoh ruh ïa u Bah Ardent ha jaka shah thngan kum ka jingai mynsiem bad jingkyrshan ïa u.
Haba kren sha ki lad pathai khubor u President ka HNYF u Bah Sadon Blah u la ong ba kum ka seng kam mynjur satia ïa ka jingkuman ka sorkar ban shu peit kai ïa ka jingshah thnagn u Bah Ardent haduh 7 sngi lynter.
“Ban shu kuman than ïa ka jingdawa u Bah Ardent kam dei ka lynti kaba dei ha ka synshar paidbah ka sorkar ka dei ban khot noh sha ka miej ïakren ban poi sha ka jingïasngewthuh jingmut ban ïahun lang na baroh arlïang mamla,” ong u Bah Sadon.
Haba kylli ïa ki daw kiba pynlong ïa ka seng ban kyrshan ïa ka jingdawa ka VPP wat la na kaba sdang kam kyrshan satia u Bah Sadon u la jubab, “U Bah Ardent u la sdang ïa ka jingïakhih ban pynbeit thymmai bad ngi ngeit ba u don ki daw bad ki nongrim ba u dawa bad ngi shniah ha u kum u nongïalam kaei ka nongrim kaba u tyrwa sha ka sorkar.”
Haba bynrap lang na ka liang u President ka FKJGP u Bah Dundee Khongsit u la ong ba ka seng hi ka ka kyrshan ïa ka jingdawa u MLA ka Nongkrem ban pynkylla ïa kane namar kam dei shuh ka jingdawa tang ka VPP hynrei jong ka jaidbynriew hi baroh kawei. “Ym dei shuh ban buhteng ka sorkar ka dei ban khot ïakren noh mardor sha ka miej jong ka jingïakren bad ngi pynrem ïa kane ka jingkuman ka sorkar,” u la ong.
Na ka liang jong u ruh u la ong ba ka seng ka kyrshan ïa ka jingong u Bah Sadon ba ka ieh beit ha ka jingstda u Bah Ardent kum u nongïalam kaba kumno ki ai jingmut sha ka sorkar. Ha kawei pat ka liang ka RBYF bad ka JSU kiba la wan lang ban ïa jingkyrshan ki la pynpaw ba ka jingdawa ka VPP ka dei ka jingdawa kaba shongnia shong aiñ bad na kata ka daw ki wan ban ai jingkyrshan ïa ka jingïakhih u Bah Ardent.