Kyrshan ka FKJGP Byrnihat Circle ba ka sorkar ka dei ban wan rah noh da ka jaka theh ñiut ba paka ha Byrnihat

Nongpoh, Nailar 13: Na ka bynta ban wan rah ïa ka khuid ka suba bad ban nym ktah ïa ka koit ka khiah ki paidbah ka thaiñ Byrnihat ha Ri Bhoi, ka FKJGP, Byrnihat Circle ka la mih shakhmat ban kyrshan na ka bynta ban don noh ka jaka theh ñiut kaba paka ha Byrnihat khnang ban lait na ka jingbret pathar ïa ki jaboh da ki paidbah bad ki nongleit nongwan lyngba ka surokbah NH-6 ha RI Bhoi District.
Ïa kane ka jingbret pathar ïa ki jaboh da ki paidbah ha ki jaka paidbah la sakhi ruh wat ha jan ka surokbah National Highway-6 kaba don ha Byrnihat bad kynthup ruh harud ka wah Byrnihat, ha kaba kane ka jingbret pathar ïa ki jaboh ym tang ba ka pynjaboh ne ka pynijli ïa ka shnong ka thaw bad ka mih ruh ka jingsma iwtung kaba ktah ïa ki paidbah wat ban ring mynsiem namar la jur ka jingsma iwtung na ki jaboh ba bret pathar da ki paidbah.
Dang shen ruh u MLA ka Jirang Constituency, u Bah Sosthenes Sohtun ryngkat bad ka Synjuk ki Dorbar Shnong Byrnihat Area, ki dang wan jurip ïa ki ar tylli ki jaka theh ñiut pathar da ki paidbah kawei ka dei harud ka surokbah National Hihghway-6 bad kawei pat ha ïew Byrnihat, ha kaba la lap ba ka jingbret pathar ïa ki jaboh ka la ktah shisha ïa ka koit ka khiah bad wat ïa ka mei mariang.
Na ka liang u MLA bad ka Synjuk ki Dorbar Shnong Byrnihat Area, halor kane ka jingdonkam ki paidbah ban ioh noh da ka jaka theh ñiut ba biang, ki la rai ban ai jingthoh sha ka sorkar jylla ba kan thaw lad thaw lynti ban wan rah ïa ka mang tyngka na ka bynta ban shna ïa ka jaka theh ñiut kiba long katkum ka juk stad ba mynta ba kan nym ktah ïa ka mariang bad ïa ka koit ka khiah ki paidbah.
Haba ïa kren bad u Mawphor, u General Secretary ka FKJGP, Byrnihat Circle, u Bah Noah Khongstid u la ong ba ka seng ka la ju kren ruh halor kane ka bynta na ka por sha ka por ba la donkam ban don no ka jaka theh ñiut kaba paka bad kum ka seng ka sngewkmen ruh ba u MLA ka Jirang, u Bah Sosthenes Sohtun bad ka Synjuk ki Dorbar Shnong Area ki la mih shakhmat ban kren halor kane ka phang ba ka seng ruh ka kyrshan bad kyrpad na ka sorkar ba ka dei ban thaw lad thaw lynti noh ban wan rah da ka jaka theh ñiut ba paka.
U Bah Noah Khongstid kum u nongïalam ka FKJGP, Byrnihat Circle u la pynpaw ruh ba katkum ka jinglap ka seng kane ka jingwan theh ñiut kam dei satia da ki trai muluk ki trai jaka, hynrei kiba bun hi kiba wan theh ñiut ki dei ki bar jylla kiba shongwai ha ka thaiñ Byrnihat bad wat kito kiba dei na Assam namar kane ka jaka ka don ha syndah ka Meghalaya bad ka Assam.
“Ka seng ka maham ruh nangne shakhmat kan dang peitngor ba ka khang ïa kito kiba wan bret pathar ïa ki jaboh ha katei ka jaka kaba don haruhd ka surokbah bad kum ka seng ka kyrpad ruh ïa ki paidbah ba ki dei ban pyrkhat lem ruh ïa ka khuid ka suba bad ka jingma kaba mih na kane kane ka jingbret pathar ïa ki jaboh” u la ong, bad bynrap ruh ka seng ka kloi ruh ban ai ka jingïatrei lang bad ki Dorbar Shnong na ka bynta ban wan rah ïa ka khuid ka suba bad khamtam ki kam kiba dei ban leh na ka bynta ka jingmyntoi ki paidbah” u la bynrap.
Shuh shuh, u la ong ruh ba ka seng ka kyrpad jur ruh ïa ka sorkar jylla ba ka dei ban phai khmat halor kane ka jingdonkam ki paidbah katei ka thaiñ ba la donkam ban don noh ka jaka theh ñiut kaba paka bad lada ym don hi ka jaka theh niut kaba paka ka long shisha kaba eh ban wan rah ïa ka khuid ka suba ha katei ka thaiñ Byrnihat Area hi baroh kawei, u la bynrap.