Shillong, Ïaïong 26: Ka Confederation of Meghalaya Social Organisations (CoMSO) ha ka sngi Saitjaiñ ka la pynpaw ka jingkyrshan kaba pura bad ka civil society organisations (CSOs) ka Garo Hills kiba la mih shakhmat ban pynpaw ïa ka sur jingïalong kawei ha ka jingïakhih shong kyllaiñ myngngor ha phyllaw jong ka Garo Hills Autonomous District Council (GHADC).
Ha ka kyrwoh khubor ka CoMSO ka la ong ba ka jingdawa ban don la ka jong ka jingthep vote na ka bynta ka elekshon sha GHADC kam dei ka jingleh kaba long pyrshah ne kaba wanrah ka jingïapait ïapra, hynrei ka dei ka jingkyrpad ban pynbeit, kaba la dawa la slem, ïa ki bor pynïaid jong ka Council, da kaba bynrap ruh ba ka jingpyndonkam ïa ka state electoral roll na ka bynta ki elekshon sha ka council ka la pyntlot ïa ka jingthmu ba kongsan jong ka Sixth Schedule, kaba la kdew ba kane ka rukom treikam kan pynthut ïa ki nongïalam shnong na ka daw jong ka jingtuklar ki seng saiñ pyrthei kiba nabar.
“Da kaba kyrpad biang ban don la ka jong ka electoral roll, ka CSO ka leh ïa kane ym ban shah kyntiat, hynrei ban ïada ïa ki bor pynïaid shnong kumba la pruid dak hapoh ka riti synshar jong ka ri,” bynrap ka CoMSO.
Ka CoMSO ka la ong ruh ba ka jingïakhih shong kyllaiñ myngngor ba la pynlong da ka Association for Democracy and Empowerment (ADE), Garo Students’ Union (GSU), A’chik Youth Welfare Organisation (AYWO), Federation of A’chik Freedom (FAF), Federation of Khasi Jaiñtia and Garo People (FKJGP), Tura Government College Students’ Union (TGCSU), bad FKJGP-TGC Cell ka dei ka kam kaba la angnud da ki paidbah na ka bynta ban ïoh ka synshar khaddar kaba bha bad ka jingpynïatylli ïa ki kolshor.
“Kine ki seng, watla ki la pynlong ïa kane ka jingïakhih da kaba jai jai, ki la pynkynmaw ïa ka Executive Committee ka GHADC ba la ïalam da ka National People’s Party (NPP), ba ki ophis paidbah ki dei ban ïoh ki jingshaniah bad ban ai ki jingshakri kiba bha,” bynrap shuh shuh ka CoMSO.
Shuh shuh ka CoMSO ka la kyntu ïa ka EC ba la ïalam da ka NPP ha GHADC ba kin mih noh na ka saiñ pyrthei kaba pynslem bad ban pynpaw ki jingeh hynrei ban shim mardor ïa ki jingithuh ïa ki jingdawa ba la buh hakhmat jong ki. “Ka GHADC kam dei ban shu neh beit tang kum ka jaka treikam kaba shu shah jied, hynrei kadei ban long kaba smat bad kaba wanrah ka jingpynbha ne ka jingkylla kaba la buh nongrim hapoh ki rukom treikam ki riewlum na ka bynta ban rai dalade bad ka jingtreikam kaba beit ka kheiñ ka diah. Kat nang slem kane ka rukom treikam, katta kan nang pynkulmar jingmut ïa ki samla, ki nongïada ïa ki riti dustur bad kumjuh ruh ïa ki paidbah ba bun.”
“Shuh shuh ngi kyrpad ïa u Lat ka jylla, ka Ministry of Tribal Affairs, bad ka Ministry of Home Affairs, Government of India, ban shim khia ïa kane ka jingpyrshah kaba mih naduh tynrai na Garo Hills. Aiba kane ka jingïakhih ym tang ba kan dei ka jingmaham, hynrei kum ka lad ban sdang wanrah ki jingkylla, ban pynthymmai ïa ka jingshah niah hapoh ki bor pynïaid shnong. Ka jingangnud jong ki paidbah jong ngi ym lah ban pynjlan khlem sangeh khlem da ïoh ïa ki jingnangnud jong ki kaba ïaid lang bad ka riti synshar paidbah,” ka la bynrap.
