Kyrpad u Nongrep ban ai jubab kloi halor ka RTI ba u wad jingtip na ka tnad Horticulture ha Ri Bhoi
Nongpoh, Naiwieng 15: Uwei na u nongrep na ka shnong Pahamrioh u la leit syndon ban pan jingshai na ka ophis ka District Horticulture Officer, Ri Bhoi kaba dei hadien ba ki la pynslem ban ai ïa ka jubab kaba u la wad jingtip lyngba ka RTI shaphang ki skhim kiba dei ban ai sha ki nongrep.
Une rangbah nongrep na Ri Bhoi, u dei u Bah S.B Sban Khongjoh, ba shong basah ha ka shnong Pahamrioh ha Ri Bhoi District bad na ka bynta ban wad jingtip halor ki skhim kyrpang ka sorkar kmie ba la tip kum ka Horticulture Mission for North East and Himalayan States (HMNEH), u la wad jingtip lyngba ka RTI Act 2005 ban pan jingshai halor ki jingpyntreikam ïa kitei ki skhim na ka bynta ki nongrep.
Kumba la pynpaw da une u rangbah, lyngba ka kyrwoh kaba u la phah sha ki lad pathai khubor, la ong ba kum u nongrep Sohniamtra, u la pan jingïarap na ka ophis ka District Horticulture Ri Bhoi halor ki lad jingïarap sha ki nongrep lyngba katei ka lad jingïarap ba wan na ka HMNEH bad namar ka jingpynslem ban ai jubab u la pan jingshai noh lyngba ka RTI ha kaba kane ka jingpad jingtip lyngba ka RTI ruh ka palat la 30 sngi ei ei, ba na ka liang ka ophis kam pat lah ban ai jubah sha u kum u nongrep uba wad jingtip halor katei ka skhim.
U la pynpaw ruh ba ka daw kaba la pynlong ïa u, ban wad jingtip lyngba ka RTI na ka bynta ban ioh jingtip kaba thikna halor ka jingpyntreikam ïa katei ka skhim HMNEH, ka dei namar ba u angnud ban ioh jingïarap na kane ka tnad treikam sorkar na ka bynta ban pynkhuid ïa ki dieng sohniamtra kiba u la rep ha Umroh 18mer.
Namar kata, na ka liang une u nongrep u la buh ruh ïa ka jingkyrpad sha u Extension District Horticulture Officer ka tnad Horticulture ban ai noh ïa ka jubab kaba kham kloi katkkum katei ka RTI kaba u la ujor ban wad jingtip bad ka thong hi kaba u angnud ka long ban ioh ïa ki lad jingïarap na ka sorkar na ka bynta ban ioh lad ban pynkhuid noh ïa ki dieng sohniamtra kiba u la rep kum uta u nongrep ban kyrshan ïa ka ing ka sem lyngba ka kam rep.