Shillong, Nailar 28: Namar ka jingsniew palat jong ka surok sha ki thaiñ Jaiñtia, na ka liang u MLA ka UDP na Mookaïaw Bah Nujorki Sungoh ula kyrpad ïa ka Sorkar Jylla ba kan pynkloi noh ïa ka jingmang pisa ban shna ïa ka surok na Madan Pohkseh kaba dei kaba la angnud lah slem bha da ki nongshong shnong.
Na ka liang u MLA u la ong ba katei ka surok ka la long kaba kongsan bha ban kyntiew ïa ka kamai ka kajih jong ki briew na ki artylli ki District ka East Jaiñtia Hills bad West Jaiñtia Hills
“Nga kyrpad ïa ka Sorkar Jylla ban sngewbha pynkloi noh ïa ka jingmang pisa ïa ka surok namar kan nang kyntiew ïa ka ïoh ka kot jong baroh artylli ki District. Ka kamai ka kajih jong ki briew ruh kan kiew bha,” ong u MLA hapoh ka Dorbar Synrai.
Haba jubab, u Symbud Myntri Rangbah ba khmih ïa ka PWD Bah Prestone Tynsong ula pyntip ba ka jingjurip ka dang ïaid shaid shaid mynta na ka bynta ban shna ïa katei ka surok.
“Ka jingïakren ruh ka la don bad ki trai jaka. Shisien ba ngi la ïasngewthuh jingmut, ngin sa ïasoi ïa ka gift deed bad ngin sa pynkhreh ïa ka Detailed Project Report (DPR) kaba long katkum ka jingdonkam jong ka kam,” ong u Bah Prestone.
