Kyrpad ka SRSBA ïa u Myntri Rangbah ban pynneh ïa ki 18 tylli ki shnong hapoh u pud ka Meghalaya

Shillong, Naitung 8 : Ka Synjuk ki Rangbah Shnong Border Area (SRSBA) ka la kyrpad ïa u Myntri Rangbah ka jylla u Conrad K Sangma ban pynthikna ba ki 18 tylli ki shnong kiba hap ha ka Raid Nongtung, Khyriem Syiemship ki dei ban neh beit hapoh u pud u sam ka Meghalaya.

Ha ka dorkhast ba la ai sha u Myntri Rangbah mynta ka Sngi Ba Ar, ka Synjuk ka la pynpaw ruh ba ki nongshong shnong ki mad ïa kiba bun ki jingeh na ka daw ka jingbym pyllait ïa ka pisa bai tiar jongka skhim Mahatma Gandhi National Rural Employment Guarantee Act (MGNREGA).

Nalor kata wat hapdeng ka jingpynlut pisa, hynrei ki trai shnong kim pat ïoh satia ïa kata ka umdih hapoh ïing kat kum ka skhim Jal Jeevan Mission (JJM).

Ka Synjuk ka kyrpad ruh ïa u Myntri Rangbah ban shim khia na ka bynta ban pynbha ïa ki lai tylli ki surok ba kongsan ha katei ka thain khappud. Kine ki kynthup ka surok na Mawlasnai sha Jatalong, Khyndewso sha Sabuda bad Thadrang sha Khliehumwang.

Nalor kane ka Synjuk ka la kyrpad ruh ïa u Myntri Rangbah ban pynïoh ia ka bording na ka Sngi ne ka Solar Lighting bad ki Batteries lyngba ka Chief Minister’s Solar Mission khnang ban ïoh bording ha katei ka thaiñ.

Ki la kyrpad shuh shuh ban seng ia ki ar tylli ki Sub Centres ha kitei ki jaka khnang ba kan ïarap ïa ki paidbah ban leit shim dawai dashin. Ka Synjuk ka kyntu jur ïa u myntri rangbah ban shim khia ïa kine ki mat bad ban pyntreikam kloi katba lah khnang ba ki paid khappud ki lait na kiba bun ki jingeh.