Shillong, Naitung 07: Ki nongialam ka seng North Eeastern Hills University Student Union (NEHUSU) mynta ka sngi Thohdieng, ki la leit ïakynduh ïa u Myntri ka tnat pynmih bording u A.T Mondal ban kyrpad ïa u ba un bthah ïa ka tnad pynmih bording ba kan pynsangeh shwa ïa ka jingpynlip bording namar ka la ktah palat ïa ki samla pule.
Haba kren sha ki lad pathai khubor ,u President ka NEHUSU u samla Ready First June Nongbsap ula ïathuh ba ka jingpynlip bording ka la ktah bha ïa ki khynnah pule khamtam kito ki ba dang don hapdeng ki eksamin bapher bapher ha kine ki sngi.
U samla Ready ula ong kane ka jingleit ïakynduh ïa u Myntri ka la wan jia hadien ba ki samla pule na katei ka skul bah ki la mad jingeh shibun ha ka ban pynkhreh ïa ka eksamin kaba dang ïaid mynta bad kaba ban sa kut ha ka 14 tarik mynta u bnai. “Ka seng NEHUSU ka kyrpad ïa ka Sorkar bad kumjuh ruh ïa ka tnad bording ba lada long ka ba lah, dei ban weng noh shuwa shipor ïa ka jingpynlip bording (Load Shedding) khnang ba ki samla pule kin ïoh bha ban pynkhreh ïa ki eksamin” ula ong.
