Kyrpad ka NEHUNSA ïa ka Sorkar Pdeng ban pynkupbor ïa u Vice-Chancellor incharge

0

Shillong, K’Lyngkot 23 : Ka skulbah North Eastern Hill University Non-Teaching Staff Association (NEHUNSA) ha ka sngi Palei ka la kyntu ïa ka jingtuklar lang jong u Myntri ka tnad Pule Puthi ka sorkar pdeng, u Dharmendra Pradhan na ka bynta ban aibor ha u Vice Chancellor (in-charge) jong ka skulbah.
“Ngi la kyrpad ïa u Myntri ka sorkar pdeng ban pynkup bor kyrpang ha u Vice Chancellor (in-charge) na ka bynta ban thung ïa ki kam ba lait kiba ïadei bad ki kam bym dei ha ki kam hikai. Da kaba peit ïa ka jinglong jingman kaba long mynta ha ka skulbah, na ka NEHUNSA kan sngew burom lada mynjur ïa katei ka jingkyrpad,” ong u President ka Association, u Dr. WR Synrem ha ka kyrwoh.
Ha kajuh ka por u ong ba ka Association ka la kyntu ruh ïa u Myntri ba un tuklar lang kham kloi na ka bynta ban pynbeit noh ïa kine ki kynrum kynram kiba don ha ka skulbah.
“Namar u Vice – Chancellor uba dei u don ha ka shutina ka daw ka jinglong jingman, u Professor ba la kham rim tam u peit ïa ka ophis jong u Vice-Chancellor katkum ka NEHU Acts and Statutes,” ong u Dr.Synrem.
Katkum ka jingong jong u, u Vice – Chancellor (in-charge) um da donbor than na ka bynta ban pyntyllun ïa ki kam ki jam kiba ïadei bad ka skulbah bad kane ka la ktah bha khamtam haba ïadei bad ka jingthung ïa ki nongtrei na bynta ki kam kiba la dep ban pynbna.
U ong ruh ba ka jingdon ki nonghikai ka la nang duna naba bun ki la shongthait noh la kumno kumno kumba 50 ngut ne tam ha ka shisnem.

Leave A Reply

Your email address will not be published.