Kyrpad ka MPCTI ïa ka sorkar pdeng bad sorkar jylla ban pynkut noh ka jingïathombor bad wallam jingsuk
![](https://mawphor.com/wp-content/uploads/2022/07/mawphor-1.jpg)
Shillong, Naitung 01 : Ka Meghalaya Prayer Church Transformation Initiative (MPCTI) ha ka sngi Saitjaiñ ka la kyrpad ïa ka Sorkar Pdeng bad ka sorkar jylla ban pynkut noh ïa ki kam thombor ba don ha Manipur bad ban pynïoh biang ïa ka suk ka saiñ ha katei ka jylla.
“Ngi kyrpad ïa kito kiba don ha ka bor ha ka jylla bad ruh ha ka sorkar pdeng ba kin pynsangeh noh ïa kine ki kam thombor baroh bad pyrshang ban wallam pat ïa ka jingsuk,” ong u Secretary ka MPCTI, u Rev H Chyne ha ka kyrwoh khubor.
“Ngi kyntu ïa baroh kiba don ka bynta ha katei ka kam thombor ba kin sangeh noh ïa ki kam thombor. Ngi khot ngi wer ruhba dei ba pynkut noh ïa ka thma sngewpher jaidbynriew da ki kynhun bapher bapher kiba pyrshang ban pynheh ïa kane ka ishu pynïaphiah bad pynjot,” u la bynrap biang.
Da kaba phah pat ïa ka jingsngewlem sha ki bahaiing ha sem jong kiba duh noh ïa la ki baieit ba thoin na ka daw ka jingïakynad ha katei ka jylla, u Rev Chyne u la ong, “Ngi kyntu ïa ki riewtymmen riewsan ha ki shnong ki thaw jongngi, ki kynhun ki seng, ki seng niam, ki jaka pule bad ki samla jong ka thaiñ ba kin wan lang khrui da ka thong ban ïaid shakhmat sha ka lawei kaba don jingshaniah bad don ka jingkyrmen.
“Ngi kyntu ïa baroh kiba shah ktah jur bad ki dang don mynta ha ka jingtieng ka jingsyier ban wad ka lad ka lynti, watla kam dei kaba suk, ban lah pat lait pat na kitei baroh da kaba buh hakhmat ïa ka lawei ki khun, ki khun ksiew bad ka pateng ban sa wan,” pynkut ka kyrwoh.