Kyrpad ka JHADC ban pynlait pisa T. 10 klur manla u bnai ban ïoh siew tulop MDC bad nongtrei

By Mawphor Editor On May 26, 2025

Shillong, Jymmang 25: Ka Jaiñtia Hills Autonomous District Council (JHADC) ka la kyrpad ïa ka sorkar jylla ba kan pyllait ïa ka pisa kaba T. 10 klur manla ka bnai sha ka council na ka bynta ban ïoh siew ïa ka tulop ha ka por kaba biang ïa ki dkhot bad ki nongtrei.
Kane kadei kawei na ki kam ba la wanrah da ka council ha ka presentation jong ka ha ka jingïalang ba dangshen bad u Symbud Myntri Rangbah u Bah Sniawbhalang Dhar bad ki nongmihkhmat na ka thaiñ Jaiñtia Hills.
“Ki tulop jong ki MDC bad ki nongtrei ka Council ym lah ban siew kloi na ka daw ka jingbym pynlait ïa ka pisa ha ka por ba biang na ka share jong ka royalty halor ki major bad minor minerals,” ong CEM ka JHADC u Bah Thombor Shiwat.
Ka JHADC ka la kyntu ruh ïa ka sorkar jylla ba kan bishar kam ruh ïa ka share royalty halor ki major bad minor minerals bad ban pynthikna ba ki rukom treikam haba ïadei bad ka jingsiew ïa ka royalty haba ïadei bad ki marpoh khyndew ba la sei na Jaiñtia Hills dei ban wanrah biang.
Ka share of royalty halor ki major bad minor mineral ka kynthup ïa ki major receipt kane ka District Council ba kan pynïaid ïa ki kam ki jam ka Council. Katba ïa ki Major bad minor minerals ba la sei na ki thaiñ kiba don ha kane ka Autonomous District kadei lyngba ka challan ba ai da ka sorkar jylla.
Lah ban kdew ba ha ki snem ba la leit ïa ki challan halor ka jingsei ïa ki marpoh khyndew na Jaiñtia Hills Autonomous District la siew ha ka Office ka Directorate of Mineral Resources ha Jowai bad ki jnit ki jnat kum ki challan la pynbeit da ka Council da Treasury Office, Jowai.
Ha kajuh ka por ka JHADC ka kyrpad ïa ka sorkar ba kan ai jingbit ban buh ïa ki khyrdop khajna khnang ban lah ban tehlakam ïa ka jinglait tuh ka khajna na ka daw ka jingkhaïi beaiñ ïa ki marpoh khyndew sha ki Cement factory ha East Jaiñtia Hills District.
“Ka jingkynthup ïa ka Autonomous District Council hapoh ka Finance Commission of India kan ïarap ban kyntiew ïa ka kam pisa ka Council ban pyntreikam ïa kiba bun ki skhim kiba hapoh ka Sixth Schedule area. Kane ka donkam ka jingpynkylla ïa ka Article 280(3) ka Constitution ka India. Naba ka jingpynkylla ïa ka artikil 125th ka dang sah ha Parliament, la kyrpad ïa ka sorkar ba kan ïakren ïa kane ka kam bad ka sorkar pdeng,” bynrap u CEM ka JHADC.